ەنەرگەتيكا ءمينيسترى الماسادام ساتقالييەۆ رەسەي مەن وزبەكستاننان ەلەكتر ەنەرگياسىن ساتىپ الۋعا قاتىستى تۇسىنىك بەردى.

— ءبىز رەسەيدەن ەلەكتر ەنەرگياسىن ەكى جاعدايدا ساتىپ الامىز، ياعني تاپشىلىقتى جابۋ ءۇشىن جانە جوسپارلانباعان اعىن جاعدايىندا. جوسپارلانباعان اعىن جاعدايى ەلەكتر جۇيەسىنىڭ جۇمىسىندا اۋىتقۋ بولعاندا تۋىندايدى. بۇل جاعدايدا ءارتۇرلى تولەم رەجيمى قاراستىرىلعان. رەسەيمەن كەلىسىم اياسىندا 150 مەگاۆاتتقا دەيىن ەلەكتر ەنەرگياسىن ءوز قۇنىمەن ساتىپ الامىز. ەگەر اۋىتقۋ 150 مەگاۆاتتان اسسا، ديسپەچەرلەۋ جانە «روسسەتي» جەلىلەرى بويىنشا قوسىمشا ترانزيت تولەنەدى. سونداي-اق، ەنەرگيا تاپشىلىعىن جابۋ ءۇشىن نارىق سۋبەكتىلەرى جۇزەگە اسىراتىن جوسپارلى اعىندار بار. شارتقا بايلانىستى باعا ءارتۇرلى. ەگەر ءبىز ەلەكتر ەنەرگياسىن رەسەي فەدەراسياسىنان بەلگىلەنگەن دياپازوندا ساتىپ الساق، ونىڭ ورتاشا قۇنى 1 كيلوۆاتت ساعاتىنا شامامەن 8 تەڭگەنى قۇرايدى. ەگەر ءبىز وسى دياپازوننان اسىپ كەتەتىن بولساق، وندا باعا كيلوۆاتت ساعاتىنا 23،8 تەڭگەگە دەيىن وسەدى، — دەپ ءتۇسىندىردى الماسادام ساتقالييەۆ ءماجىلىستىڭ جالپى وتىرىسىندا.

ءمينيستردىڭ ايتۋىنشا، قازاقستان ەلەكتر ەنەرگياسىن كوپ تۇتىناتىن ۋاقىتتا كورشىلەس ەلدەردەن قىمبات باعامەن ساتىپ الۋعا ءماجبۇر. 

— وتكەن جىلى ءىشىنارا وزبەكستاننان ساتىپ الدىق، سونىمەن قاتار رەسەيدەن دە ساتىپ الامىز، ورتاشا باعاسى، ياعني كيلوۆاتى ساعاتىنا 48 تەڭگەنى قۇرايدى. ءبىراق بۇل ءتاريفتىڭ قىمباتتاۋىنا اكەلمەيدى. نەگە؟ سەبەبى بۇل ءماجبۇرلى ساتىپ الۋ، ونىڭ باسقا جولى جوق. ايتپەسە، ىشكى تۇتىنۋشىلارعا شەكتەۋ قويۋعا الىپ كەلەر ەدى، — دەپ تولىقتىردى ۆەدومستۆو باسشىسى.