ق ر پرەمەر-مينيسترىنىڭ ورىنباسارى، ۇلتتىق ەكونوميكا ءمينيسترى سەرىك جۇمانعارين قوسىمشا قۇن سالىعى (ققس) مولشەرىنىڭ ءوسۋى قازاقستانداعى باعاعا قالاي اسەر ەتەتىنىن ايتتى.
ءجۇمانعاريننىڭ سوزىنشە، ۇكىمەت ققس-نىڭ جاڭا مولشەرىن ءالى شەشكەن جوق. دەسە دە، ونىڭ ءوسۋى ەلدەگى قىمباتشىلىققا ءسوزسىز اسەر ەتەدى.
"ارينە، ءسوزسىز اسەر ەتەدى. ءار سالادا اسەر ءارتۇرلى بولادى. ءبىز مولشەرلەمەنىڭ كوتەرىلۋى بيزنەسكە تۇسەتىن ورتاشا جۇكتەمەنى نەبارى 4 پايىزعا كوبەيتەتىنىن ەسەپتەدىك. دەگەنمەن تۇپكى تۇتىنۋشى باعانىڭ قىمباتتاعانىن سەزىنەتىنى انىق"، - دەدى ول.
سونداي-اق ول ينفلياسيانىڭ بولجامدى ءوسۋ دەڭگەيىن اتادى.
"ءبىزدىڭ ەسەپتەۋىمىز بويىنشا ينفلياسيا دەڭگەيى شامامەن 4،5 پايىزعا دەيىن ءوسۋى مۇمكىن. بۇل ءوسىم قوسىمشا قارجى رەسۋرستارىن، ەڭ الدىمەن ەكونوميكانىڭ ناقتى سەكتورىن دامىتۋعا باعىتتاۋ ارقىلى وتەلۋگە ءتيىس"، - دەپ جاۋاپ بەردى جۇمانعارين.
پىكىر قالدىرۋ