Respublica پارتياسى اتىنان سايلانعان ءماجىلىستىڭ جاڭا دەپۋتاتى ەكاتەرينا سمولياكوۆا انت بەردى.
ال دەپۋتات رۋسلان بەردەنوۆتىڭ وكىلەتتىگى مەرزىمىنەن بۇرىن توقتاتىلدى. بوساعان ماندات پارتيالىق تىزىمدە تۇرعان ەكاتەرينا سمولياكوۆاعا بەرىلدى.
ايتا كەتەيىك، رۋسلان بەردەنوۆ شىمكەنت اكىمىنىڭ ورىنباسارى بولدى.
ەكاتەرينا سەرگەيەۆنا سمولياكوۆا 1987 جىلى 2 تامىزدا دۇنيەگە كەلگەن.
ونىڭ قازاق ءتىلى مەن ادەبيەتى ماماندىعى بويىنشا جوعارى ءبىلىمى، سونداي-اق، قازاقستان-بريتان تەحنيكالىق ۋنيۆەرسيتەتىندە العان DBA دارەجەسى بار.
سمولياكوۆانىڭ ءبىلىم بەرۋ جانە باسقارۋ سالاسىندا ايتارلىقتاي جۇمىس تاجىريبەسى بار. ول قازاقستان-بريتان تەحنيكالىق ۋنيۆەرسيتەتىنىڭ (قبتۋ) پرورەكتورى بولدى، سونداي-اق، مانساپ جانە تۇلەكتەرمەن جۇمىس ورتالىعىن باسقاردى.
2020 جىلدان بەرى ول ءتۇرلى قوعامدىق قىزمەتكە بەلسەندى قاتىسىپ، KBTU Empowerment ايەلدەر كلۋبىن باسقارادى جانە الماتى وبلىستىق №1 بالالار ءۇيىنىڭ قامقورشىلىق كەڭەسىنىڭ ءتورايىمى قىزمەتىن اتقارادى.
پىكىر قالدىرۋ