شىمكەنت قالاسىنداعى «جاستار رەسۋرستىق ورتالىعىندا» ىشكى ءتارتىپ پەن قىزمەتكەرلەرگە كورسەتىلىپ جاتقان قىسىمعا قاتىستى شۋ شىقتى. ياعني، ورتالىق قىزمەتكەرلەرىنىڭ بىرنەشەۋى ءانونيمدى تۇردە شاعىم ءتۇسىرىپ، باسشىلىق تاراپىنان الەۋمەتتىك جەلىلەردەگى بەلسەندىلىگىنە بايلانىستى قىسىمعا ۇشىراپ جاتقاندارىن ايتادى.
بۇل تۋرالى العاش بولىپ جەرگىلىكتى بلوگەر ازات ديداربەك ءوزىنىڭ الەۋمەتتىك جەلىدەگى پاراقشاسىندا جازدى. ونىڭ مالىمەتىنشە، ورتالىق باسشىلىعى قىزمەتكەرلەردەن مەكەمەنىڭ پاراقشالارىنداعى جازبالارعا مىندەتتى تۇردە لايك باسىپ، پىكىر قالدىرىپ وتىرۋدى تالاپ ەتكەن. بۇل تالاپ ورىندالماعان جاعدايدا ەسكەرتۋ جاسالىپ، قىزمەتكەردىڭ ەسىمى ارنايى تىزىمگە ىلىنەتىن بولعان.
— كەيبىر قىزمەتكەرلەر الەۋمەتتىك جەلىدەگى بەلسەندىلىگى ءۇشىن ءسوز ەستىپ، ءتىپتى «ەسكەرتۋ» العان. جۇيكەسى سىر بەرگەندەر بار. بۇگىن عانا ورتالىق قىزمەتكەرلەرىنىڭ ءبىرى قىسىمعا شىداي الماي، ەسىنەن تانىپ قالدى. جەدەل جاردەم شاقىرىلىپ، العاشقى مەديسينالىق كومەك كورسەتىلدى، — دەيدى ازات ديداربەك.
ونىڭ ايتۋىنشا، مەكەمە باسشىلىعى جاستار ساياساتىن جۇرگىزۋدىڭ ورنىنا، ۇجىم ىشىندەگى ءتارتىپتى الەۋمەتتىك جەلىدەگى بەلسەندىلىك ارقىلى باقىلاۋعا تىرىسۋدا. بۇل جاعداي «جاستار رەسۋرستىق ورتالىعى» سىندى قوعامدىق ماڭىزى بار مەكەمەنىڭ بەدەلىنە نۇقسان كەلتىرۋدە.
رەسمي پىكىر
اتالعان جاعدايعا قاتىستى شىمكەنت قالالىق ىشكى ساياسات جانە جاستار ىستەرى جونىندەگى باسقارماسىنىڭ باسشىسى ايگەرىم جۇماعۇلوۆا تۇسىنىكتەمە بەردى. ول بۇل ماسەلەدەن تولىق حاباردار ەكەنىن مالىمدەدى.
— الاڭداپ، سىلتەمە جىبەرىپ وتىرعاندارىڭىزعا راحمەت. ءبىراق ءارى قاراي جىبەرۋدىڭ قاجەتى جوق. مەن جاعدايدىڭ العاشقى جاريالانۋىنان باستاپ حاباردارمىن. وزىمە جۇمىس جوسپارىن بەلگىلەدىم. جاعداي بويىنشا شەشىم ادىلەتتى جانە وبەكتيۆتى تۇردە قابىلدانادى، — دەدى باسقارما باسشىسى.
قازىرگى ۋاقىتتا وقيعاعا قاتىستى قوسىمشا مالىمەتتەر انىقتالىپ جاتىر. قىزمەتكەرلەر قۇقىعىنىڭ بۇزىلۋ دەرەكتەرى راستالعان جاعدايدا، ءتيىستى شارالار قابىلدانۋى مۇمكىن.
