الماتى وبلىسى اكىمدىگىنىڭ وكىلدەرى مەن وڭتۇستىك كورەيانىڭ RETD CO.، LTD كومپانياسى دەلەگاسياسى الماتى مەن قونايەۆ قالالارىن جالعايتىن جەڭىل رەلستى كولىك (LRT) جەلىسى جوباسىن تالقىلادى. جوبا زاماناۋي ماگنيتتى ءىلىنىس (ماگليەۆ) تەحنولوگياسىن قولدانۋدى كوزدەيدى.

كەزدەسۋدە الماتى وبلىسى اكىمىنىڭ ورىنباسارى رۋستام يساتايەۆ كولىك ينفراقۇرىلىمىن دامىتۋدىڭ ستراتەگيالىق ماڭىزىنا توقتالىپ، ءوڭىردىڭ ينۆەستيسيالىق الەۋەتى تۋرالى ايتتى.

– الماتى وبلىسى – ينۆەستيسيالىق جانە ينفراقۇرىلىمدىق الەۋەتى جوعارى، قارقىندى دامىپ كەلە جاتقان ءوڭىر. ءبىز كولىك قولجەتىمدىلىگىن ارتتىرۋعا جانە تۇرعىنداردىڭ ءومىر ساپاسىن جاقسارتۋعا باسىمدىق بەرەمىز. ماگليەۆ تەحنولوگياسىن قولداناتىن LRT جوباسى – وسى باعىتتاعى ماڭىزدى قادامداردىڭ ءبىرى، – دەدى رۋستام يساتايەۆ.

كەزدەسۋگە قاتىسقان RETD CO.، LTD كومپانياسىنىڭ اتقارۋشى ديرەكتورى لي چان ۋك ءوز سوزىندە ماگليەۆ تەحنولوگياسىنىڭ ارتىقشىلىقتارى مەن كومپانيانىڭ ازيا ەلدەرىندەگى ۇقساس جوبالارداعى تاجىريبەسىمەن ءبولىستى.

– ءبىزدىڭ تاجىريبەمىز بەن تەحنولوگيامىز قازاقستان ءۇشىن پايدالى بولادى دەپ سەنەمىز. ماگليەۆ – بۇل بولاشاقتىڭ كولىگى، جانە ءبىز الماتى وبلىسىنىڭ اۋقىمدى دامۋىنا ۇلەس قوسۋعا دايىنبىز، – دەدى لي چان ۋك.

ماگليەۆ (ماگنيتتىك ليەۆيتاسيا) تەحنولوگياسى ارقىلى قوزعالاتىن پويىزدار رەلسكە تيمەي، اۋادا "قالقىپ" جۇرەتىندىكتەن، جوعارى جىلدامدىق پەن ءۇنسىز قوزعالىس سەكىلدى ءبىرقاتار ارتىقشىلىققا يە. سونداي-اق، بۇل جۇيە ەكولوگيالىق تازا كولىك رەتىندە تانىلىپ وتىر.

الداعى ۋاقىتتا تاراپتار جوبانى ناقتىلاۋ، تەحنيكالىق-ەكونوميكالىق نەگىزدەمە ازىرلەۋ جانە ينۆەستيسيالىق تەتىكتەردى پىسىقتاۋ بويىنشا بىرلەسكەن جۇمىستى جالعاستىرماق.