پاۆلودار وبلىسىنىڭ پروكۋراتۋراسى ەرتىس اۋدانىندا الەۋمەتتىك وسال توپتارعا ارنالعان تۇرعىن ءۇيدى ءبولۋ كەزىندە زاڭ بۇزۋشىلىقتار بولعانىن مالىمدەدى. تەكسەرۋ ناتيجەسىندە جەتىم بالاعا تيەسىلى پاتەر اۋدان اكىمىنىڭ جاڭادان تاعايىندالعان ورىنباسارىنا بەرىلگەن.

2025 جىلدىڭ اقپان ايىندا ەرتىس اۋدانى اكىمىنىڭ ورىنباسارى قىزمەتىنە كىرىسكەن روزا اقانوۆاعا پاتەر بەرىلگەن. بۇل شەشىمدى اۋداندىق ناقتى سەكتور ءبولىمىنىڭ باسشىسى قايروللا ەلەۋكەنوۆ قابىلداپ، اقانوۆانى بۇرىن جەتىم بالاعا جالعا بەرىلگەن پاتەرگە ورنالاستىرعان. شەنەۋنىكتەر جەتىم قىزدىڭ پاتەردە سوڭعى ءبىر جىلدان بەرى تۇرماعانىن ايتىپ، باسپانانى بوس دەپ ەسەپتەگەن.

ماسەلەنى وبلىستىق ادەپ كەڭەسى قاراپ، مەملەكەتتىك تۇرعىن ءۇي قورىن ماقساتسىز پايدالانعان ءبولىم باسشىسىنا شارا قولدانىلدى. ال اقانوۆا پاتەردى بوساتىپ، شىعۋعا مىندەتتەلدى. وعان «قىزمەتىنە تولىق سايكەس ەمەستىگى تۋرالى» رەسمي ەسكەرتۋ جاسالدى.

پروكۋراتۋرانىڭ مالىمەتىنشە، بۇل — جەكەلەگەن ەمەس، جۇيەلى سيپات العان ماسەلە. ماسەلەن، مۇتكەنوۆ كوشەسىندەگى الەۋمەتتىك پاتەردە دە اۋدان اكىمىنىڭ ورىنباسارى تۇرعان. سونداي-اق، №1 ەرتىس ورتا مەكتەبىنىڭ ءمۇعالىمى وسىنداي ۇيدە بەس جىل بويى زاڭسىز تۇرىپ كەلگەن.

قازىرگى تاڭدا ەرتىس اۋدانىندا وسىنداي ماقساتتاعى بوس تۇرعان 14 پاتەر بار. الايدا ولار ءالى كۇنگە دەيىن شىن مانىندە مۇقتاج ازاماتتارعا بەرىلمەي وتىر. پروكۋراتۋرا جاعدايدى قالپىنا كەلتىرىپ، ءادىل شەشىم قابىلداۋدى تالاپ ەتتى.