تۇركياداعى جەر سىلكىنىسى كەزىندە زارداپ شەككەندەردىڭ ىشىندە قازاقستاندىقتار جوق.

بۇل تۋرالى قازاقستاننىڭ سىرتقى ىستەر مينيسترلىگى مالىمدەدى.

ءساۋىردىڭ 23ء-ى كۇنى تۇركيانىڭ ىستانبۇل قالاسىندا 6،2 بالدىق جەر سىلكىنىسى بولدى. ءقازىر افتەرشوكتار جالعاسۋدا.

"قازىرگى ۋاقىتتا تۇركيادا جۇرگەن قازاقستان ازاماتتارىنان ىستانبۇلداعى باس كونسۋلدىققا ەشقانداي ءوتىنىش تۇسكەن جوق. مينيسترلىك جاعدايدى تۇركيا بيلىگىمەن جانە قازاقستاننىڭ تۇركياداعى ديپلوماتيالىق وكىلدىكتەرىمەن بىرلەسە قاداعالاپ وتىر"، – دەپ حابارلادى مينيسترلىك.

ىستانبۇلداعى قازاقستاننىڭ باس كونسۋلدىعىنىڭ كونسۋلدىق ەسەبىندە 1 137 قازاقستان رەسپۋبليكاسىنىڭ ازاماتى تىركەلگەن.

ەلشىلىك قالاداعى قازاقستاندىقتاردى سابىر ساقتاۋعا، بارىنشا ساقتىق تانىتۋعا جانە جەرگىلىكتى بيلىكتىڭ بارلىق نۇسقاۋلارىن مۇلتىكسىز ورىنداۋعا شاقىردى.

ايتا كەتەيىك، ىستامبۋلدا جەر سىلكىنىسى كەزىندە قورىققاننان بيىكتەن سەكىرگەن 151 ادام جاراقات العان.

“قورقىپ بيىكتەن سەكىرگەن 151 ادام جاراقات الدى. ولار اۋرۋحانادا ەم الىپ جاتىر. ومىرلەرىنە ءقاۋىپ ءتونىپ تۇرعان جوق"، – دەپ حابارلادى ىستانبۇل اكىمشىلىگى.

تۇركيا پارلامەنتىنىڭ ءتوراعاسى جەر سىلكىنىسىنە قاتىستى پىكىر ءبىلدىردى.

“ىستامبۋل مەن اينالاسىندا سەزىلگەن قاتتى جەر سىلكىنىسىمەن بىتپە-بەت كەلدىك. بۇل جەر سىلكىنىسىن ەشقانداي زارداپسىز وتكەرەمىز دەپ ۇمىتتەنەمىز. الايدا ىستامبۋلدا بولجانعان اۋىر جەر سىلكىنىسى كەز كەلگەن ۋاقىتتا بولۋى ىقتيمال. سوندىقتان جان-جاقتى دايىن بولۋىمىز كەرەك”، – دەدى نۋمان كۋرتۋلمۋش.