قاسىم-جومارت توقايەۆتىڭ توراعالىعىمەن قاۋىپسىزدىك كەڭەسىنىڭ كولىك جانە لوگيستيكا سالاسىن دامىتۋعا ارنالعان وتىرىسى ءوتتى. جيىندا كولىك ءمينيسترى مارات قارابايەۆ پەن ءبىرقاتار ورتالىق مەملەكەتتىك ورگانداردىڭ باسشىلارى ەسەپ بەردى.
وتىرىستا مەملەكەت باسشىسى سالاداعى قازىرگى جاعدايعا توقتالىپ، كولىك ينفراقۇرىلىمىن دامىتۋدا قوردالانعان ماسەلەلەر مەن بەلگىلەنگەن مىندەتتەردىڭ ورىندالماۋىن قاتاڭ سىنعا الدى. پرەزيدەنتتىڭ ايتۋىنشا، بۇل پروبلەمالار جاڭعىرتۋ جۇمىستارىنىڭ ءتيىمدى جۇرگىزىلۋىنە ەلەۋلى كەدەرگى كەلتىرىپ وتىر.
قاسىم-جومارت توقايەۆ شەكارالىق وتكىزۋ بەكەتتەرىندەگى جاعدايدىڭ كۇردەلى ەكەنىن، جۇك تاسىمالى بارىسىندا كوپتەگەن قيىندىقتاردىڭ بار ەكەنىن اتاپ ءوتتى. ءىرى ينفراقۇرىلىمدىق جانە ترانزيتتىك جوبالاردىڭ ۋاقىتىلى جۇزەگە اسپاۋى دا سىنعا الىندى. مەملەكەت باسشىسى "جاسىل ءدالىز" جۇيەسىن جولعا قويۋ جانە ەلىمىزدىڭ لوگيستيكالىق الەۋەتىن ءتيىمدى پايدالانۋ قاجەتتىگىن ايتتى. ونىڭ پىكىرىنشە، جاھاندىق سىن-قاتەرلەر ۇدەپ وتىرعان كەزەڭدە قازاقستان ءوز باسەكەلەستىك ارتىقشىلىقتارىن ساقتاپ قانا قويماي، ولاردى ودان ءارى نىعايتۋى ءتيىس.
سونىمەن قاتار، جۇك تاسىمالى كولەمىن ارتتىرۋ ءۇشىن ىشكى نارىقتى اۆياوتىنمەن تولىق قامتاماسىز ەتۋ، مۋلتيپليكاتيۆتىك اسەرى جوعارى جۇك تاسىمالىن ۇلعايتۋ جانە قازاقستاننىڭ الەمدىك جەتكىزۋ تىزبەگىنە بەلسەندى قوسىلۋى مىندەتى قويىلدى.
جيىن قورىتىندىسىندا پرەزيدەنت كولىك ءمينيسترى مارات قارابايەۆقا جىبەرىلگەن كەمشىلىكتەرى ءۇشىن سوگىس جاريالاپ، سالاداعى پروبلەمالاردى شەشۋگە باعىتتالعان ناقتى شارالاردى قابىلداۋدى تاپسىردى.
