اباي وبلىسىنداعى اسكەري بولىمدە 18 جاستاعى سالامات ءسابيتوۆ كوز جۇمدى. ونىڭ تۋىستارىنىڭ ايتۋىنشا، سارباز اسكەرگە دەنساۋلىعىندا اقاۋى بولا تۇرا الىنعان. سالامات ناۋرىزدا سولتۇستىك قازاقستان وبلىسىنان شاقىرىلىپ، ءۇش اپتا عانا قىزمەت ەتكەن. انت قابىلداپ تا ۇلگەرمەگەن.

تۋىستارىنىڭ سوزىنشە، وعان ومىرتقا مەن كوز ماسەلەلەرىنە بايلانىستى «اسكەرگە جارامسىز» دەگەن انىقتاما بەرىلگەن. سوعان قاراماستان، ونى تانك بولىمىنە جىبەرىپ، كەيىن جاعدايى كۇرت ناشارلاپ، اۋرۋحاناعا تۇسكەن. ساربازدىڭ ولىمىنە مي قابىنۋى مەن مەنينگيت سەبەپ بولعانى ايتىلدى.

"22 ساۋىردە ەكى قىزمەتكەر تۇنگى ساعات 22.00-دە ۇيگە كەلدى. ۇلىمدى اسكەري مىندەتىنەن جالتارىپ ءجۇر دەپ ايىپتاپ، قىلمىستىق قۋدالاۋ ءقاۋپى تونەتىنىن ايتتى. ءتىپتى ءىس اسكەري پروكۋرورعا بەرىلەتىنىن جەتكىزدى. ايتپەسە بىزگە ءتورت ميلليون تەڭگە ايىپپۇل تولەۋگە تۋرا كەلەتىنىن العا تارتتى. ال مەندە ونداي اقشا جوق. ءوزىمىز پاتەر جالداپ تۇرامىز. تاڭەرتەڭ ونى سول جەردەن اسكەرگە الىپ كەتتى. الايدا بۇل كەزدە مەن جۇمىستا بولدىم. ونى پويىزدا بولعان كەزدە عانا كوردىم. مەزگىل-مەزگىل قوڭىراۋ شالىپ تۇردىق. ەشتەڭەگە شاعىمدانعان جوق. سودان كەيىن ۇلىم جانساقتاۋ بولىمىنە ءتۇستى. كوماندير ءبارى جاقسى ەكەنىن ايتىپ، الاڭداماۋىمدى ءوتىندى. الايدا ءبىز سەنبەي تۋىسقانىمىزدى جىبەردىك. تۋىسىمىز سالاماتتىڭ كوماعا تۇسكەنىن حابارلادى. سودان مەن اۋرۋحاناعا تاڭەرتەڭ جەتتىم. سول كۇنى ونىڭ جۇرەگى توقتاپ قالدى"، – دەپ جىلادى ساربازدىڭ اناسى.

سالاماتتىڭ اناسى بالاسىن اسكەرگە جىبەرمەسە، ايىپپۇل سالىناتىنىن ايتىپ، قورقىتقانىن جەتكىزدى. قورعانىس مينيسترلىگى ساربازدىڭ ءولىمىن راستادى. ءقازىر قىلمىستىق ءىس قوزعالىپ، تەكسەرۋ ءجۇرىپ جاتىر.