الماتى اكىمدىگى شاھاردا بەس نەگىزگى پوليورتالىق قۇرۋدى جوسپارلاپ وتىر.

"الماتىباسجوسپار" مەكەمەسى قالادا بەس نەگىزگى پوليورتالىق – زاماناۋي قوعامدىق-ىسكەرلىك كلاستەرلەردى قالىپتاستىرۋ جوباسىن ۇسىندى. بۇل باستاما ىسكەرلىك بەلسەندىلىكتى قايتا بولۋگە، قالانىڭ ورتالىق اۋداندارىنا تۇسەتىن جۇكتەمەنى ازايتۋعا جانە مەگاپوليس اياسىندا ءوسۋدىڭ تولىققاندى نۇكتەلەرىن قۇرۋعا باعىتتالعان.

اتالعان شارالار الماتىنى دامىتۋ باعدارلاماسى مەن 2040 جىلعا دەيىنگى باس جوسپار اياسىندا جۇزەگە اسىرىلادى. قالا مونوورتالىقتى دامۋ ۇلگىسىنەن پوليورتالىقتى جۇيەگە كوشۋگە بەت بۇرماق.

الماتىدا بەس نەگىزگى پوليورتالىق قۇرىلادى:

"سولتۇستىك" پوليورتالىعى الماتى-1 تەمىرجول ستانسياسى ماڭىندا قۇرىلادى. مۇندا قىزمەت كورسەتۋ سالاسىن دامىتۋ جوسپارلانعان. عيماراتتاردىڭ ءبىرىنشى قاباتتارى شاعىن بيزنەسكە جالعا بەرىلەدى. سونىمەن قاتار ۇلكەن الماتى كانالى مەن باۋم توعايى بويىندا سكۆەرلەر مەن دەمالىس ورىندارى قاراستىرىلعان.

"باتىس" پوليورتالىعى جاڭا الماتى-3 تەمىرجول ۆوكزالى مەن بورالداي كەنتىندەگى كولىك حابى اۋماعىندا ورنالاسادى. بۇل جەردە ەتنوگرافيالىق "ساق قورعاندارى" پاركى اينالاسىندا بارلىق قاجەتتى ينفراقۇرىلىم تارتىلادى. 90 گەكتار اۋماقتى قامتيتىن جەلىلىك رەكرەاسيالىق ساياباق، جاڭا كوپسالالى اۋرۋحانا كەشەنى جانە باسقا دا نىساندار سالۋ جوسپارلانىپ وتىر.

"وڭتۇستىك-باتىس" پوليورتالىعى رايىمبەك داڭعىلى مەن الاتاۋ كوشەسى (جوسپارلانعان جاڭا كوشە) قيىلىسىندا ورنالاسادى. بۇل ايماقتا وندىرىستىك ميني-پاركتەر، ساۋدا جانە لوگيستيكالىق نىساندار، اكىمشىلىك-ىسكەرلىك ورتالىقتار ورنالاستىرىلماق.

"تاريحي ورتالىق" — مەدەۋ اۋدانىنىڭ ءبىر بولىگى، ياعني "التىن شارشى" دەپ اتالاتىن ايماق: بايتۇرسىنوۆ كوشەسى – اباي داڭعىلى – زەنكوۆ كوشەسى – جىبەك جولى كوشەسى شەكاراسىندا ورنالاسقان. بۇل اۋماقتا وندىرىستىك كاسىپورىندار قاراستىرىلماعان. تاريحي جانە مادەني ماڭىزى بار عيماراتتار قايتا جوندەلىپ، قالپىنا كەلتىرىلەدى.

"شىعىس قاقپا" پوليورتالىعى — تالعار جانە قۇلجا تاس جولدارىنىڭ قيىلىسىنداعى اۋماق. بۇل جەردە الماتىنىڭ لوگيستيكالىق حابى ورنالاسپاق.