رۋسلان جاقسىلىقوۆتىڭ قاماۋعا الىنعانى تۋرالى اقپارات شىندىققا جاناسپايدى — ەكس-مينيستردىڭ ءوزى مالىمدەدى

2025 جىلعى 10 ماۋسىمدا الەۋمەتتىك جەلىلەردە بۇرىنعى قورعانىس ءمينيسترى رۋسلان جاقسىلىقوۆتىڭ قاماۋعا الىنعانى جونىندە اقپارات تارادى. جازبالاردا ەكس-مينيستردىڭ استانا قالاسىنداعى ۋاقىتشا ۇستاۋ يزولياتورىندا وتىرعانى تۋرالى ايتىلعان.

"رۋسلان جاقسىلىقوۆ استانا قالاسىنداعى ۋاقىتشا ۇستاۋ يزولياتورىندا وتىر. تەرگەۋ امالدارىنا بايلانىستى باسقا مالىمەتتەر جاريا ەتىلمەيدى"، – دەلىنگەن العاشقى تاراعان حابارلامادا.

الايدا اتالعان اقپاراتتى Tengrinews.kz تىلشىلەرى ناقتىلاپ، رۋسلان جاقسىلىقوۆپەن ۆيدەوقوڭىراۋ ارقىلى تىكەلەي سويلەسكەن. ەكس-مينيستر بۇل مالىمەتتىڭ جالعان ەكەنىن مالىمدەدى.

— بۇل بوس ءسوز. بىرىنشىدەن، تەك رەسمي اقپارات كوزدەرىنە سەنۋ كەرەك. قازىرگى ۋاقىتتا مەن دەمالىستامىن. ماعان دەمالۋعا مۇمكىندىك بەرىلدى. سوڭعى ءۇش جارىم جىلدا العاش رەت دەمالىسقا شىعىپ وتىرمىن. وزدەرىڭىز بىلەسىزدەر، بۇل قىزمەت ۇنەمى تولىقتاي ۋاقىتتى تالاپ ەتەدى، — دەدى جاقسىلىقوۆ.

ونىڭ ايتۋىنشا، قازىرگى ۋاقىتتا ول استاناداعى ۇيىندە، وتباسىمەن بىرگە دەمالىپ جاتىر. ءتىپتى بالالارىنا ارناپ اۋلاعا باتۋت ورناتىپ قويعانىن دا اتاپ ءوتتى.

سونىمەن قاتار، جاقسىلىقوۆ جالعان اقپارات تاراتقاندارعا قاتىستى قۇقىق قورعاۋ ورگاندارىنا جۇگىنۋگە نيەتتى ەكەنىن ءبىلدىردى.

— ار-نامىسىم مەن ابىرويىما نۇقسان كەلتىرەتىن جالعان اقپارات تاراتقانداردىڭ ۇستىنەن زاڭ اياسىندا شارا قولدانۋ ءۇشىن قۇقىق قورعاۋ ورگاندارىنا جۇگىنۋگە ءماجبۇرمىن، — دەدى ول.