ول ءماجبۇرلى ەمدەۋگە جىبەرىلدى.

2025 جىلدىڭ 23 ناۋرىزىندا اقتوبە وبلىسى مۇعالجار اۋدانى قاندىاعاش قالاسىندا اۋىر قىلمىس تىركەلدى. توركىنىنە ەمدەلۋ ءۇشىن كەلگەن 29 جاستاعى كەلىنشەك ءوز ۇلى مەن قىزىن تۇنشىقتىرىپ ءولتىردى. بۇگىن اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا وعان قاتىستى ۇكىم جاريالاندى.

ايىپتالۋشى ايەلگە قىلمىستىق كودەكستىڭ 99-بابىنىڭ 3-بولىگى بويىنشا (ەكى نەمەسە ودان دا كوپ ادامدى ءولتىرۋ) ايىپ تاعىلعان. سوتتا ونىڭ كۇيەۋى، اكەسى جانە اعاسى كۋالىك بەرىپ، كەلىنشەكتىڭ پسيحيكالىق دەنساۋلىعىنداعى اۋىتقۋلار تۋرالى ايتىپ ءوتتى. مارقۇم بولعان بالالاردىڭ اناسى مەكتەپتى، كوللەدجدى جانە ەكى جوعارى وقۋ ورنىن ۇزدىك اياقتاعان، سپورتپەن دە بەلسەندى اينالىسىپ، تاەكۆوندودان وبلىس چەمپيونى اتانعان. تۇرمىسقا شىققاننان كەيىن اتىراۋ وبلىسىنىڭ ساعىز اۋىلىندا تۇرىپ، سول جەردە ەكى بالانى دۇنيەگە اكەلگەن.

سوتتا سويلەگەن اكەسىنىڭ ايتۋىنشا، قىزى سوڭعى كەزدەرى مازاسىز كۇيدە جۇرگەن. “يمام مەن دارىگەرگە كورسەتتىم، ەم قابىلداعان سوڭ ءبىراز تىنىشتالدى. كەيىن مەن جۇمىسقا كەتكەنىمدە، جاعدايىن تەلەفون ارقىلى باقىلاپ وتىردىم. جاعدايىنىڭ ناشارلاعانىن ەستىپ، ءدارى ءىشۋىن ايتتىم. اراعا ەكى ساعات وتكەندە ءوزى قوڭىراۋ شالىپ، بالالارىن تۇنشىقتىرىپ ولتىرگەنىن ايتتى. ەندى كىمگە رەنجيمىز؟” — دەدى ول سوتتا.

سوت ساراپتاماسىنىڭ قورىتىندىسى بويىنشا، ايەل اۋىر پسيحيكالىق دەرتكە شالدىققان: پارانويدتى شيزوفرەنيانىڭ دەپرەسسيالىق-پارانويدتى سيندروم ءتۇرى، سۋيسيدتىك تەندەنسيالارى بار. ول ءوز ىس-ارەكەتتەرىن تولىق ءتۇسىنىپ، باقىلاۋ قابىلەتىنەن ايىرىلعان.

سوت ونىڭ اقىل-ەسى دۇرىس ەمەس كۇيدە قىلمىس جاساعانىن مويىنداپ، قىلمىستىق كودەكستىڭ 99-بابى 3-بولىگى بويىنشا قىلمىستىق جاۋاپكەرشىلىكتەن بوساتتى. سونىمەن قاتار، قىلمىستىق كودەكستىڭ 93-بابىنىڭ 1-بولىگى 2-تارماعىنا سايكەس، سوتتالۋشىنى ءجىتى باقىلاۋداعى مامانداندىرىلعان پسيحياتريالىق ستاسيونارعا ءماجبۇرلى تۇردە ەمدەۋگە جىبەرۋ تۋرالى شەشىم شىعاردى.

ەسكە سالايىق، قايعىلى وقيعادا 2022 جىلى تۋعان ۇلى مەن 2024 جىلى دۇنيەگە كەلگەن قىزى قازا تاپقان ەدى.