6 ماۋسىم كۇنى قازاقستان مەن ۇلىبريتانيا اراسىندا 2025–2026 جىلدارعا ارنالعان اسكەري ىنتىماقتاستىق جوسپارى بەكىتىلدى. بۇل كەلىسىم كوپشىلىككە جاريا ەتىلگەنىمەن، رەسەيلىك تەلەجۇرگىزۋشى تينا كاندەلاكي بۇل جاڭالىققا كۇمانمەن قاراپ، قازاقستان بيلىگىن اقپاراتتى ادەيى جاسىردى دەپ ايىپتادى.

كاندەلاكي Telegram-ارناسىندا:

«جاڭالىقتى ەشكىم بايقاماسىن دەسەڭ، ونى جۇما كۇنى كەشكە جاريالا. بىرىنشىدەن، ءبارىنىڭ ويى دەمالىستا، ەكىنشىدەن — دۇيسەنبىگە دەيىن ۇمىتىلىپ كەتۋى مۇمكىن، اسىرەسە دەمالىس كۇندەرى قىزىقتى بىردەڭە بولىپ جاتسا» دەپ جازدى كاندەلاكي.

ونىڭ ايتۋىنشا، بۇل كەلىسىمدى حالىقتىڭ نازارىنان تىس قالدىرۋ ءۇشىن بيلىك جەكسەنبى كۇنى قورعانىس ءمينيسترىن قىزمەتىنەن بوساتۋ تۋرالى جارلىق جاريالاعان.

سونداي-اق كاندەلاكي:

«ايتا كەتەيىك، قازاقستان — ۇقشۇ-نىڭ مۇشەسى. ال بۇل اسكەري ۇيىم 2021 جىلدىڭ قاڭتارىندا توقايەۆ مىرزانى جانە ونىڭ اينالاسىنداعى ادامداردى اسكەري توڭكەرىستەن امان الىپ قالعان ەدى. ۆەنگريا نەمەسە سلوۆاكيا ەۋرووداق ساياساتىنا قانشالىقتى نارازى بولسا دا رەسەيمەن اسكەري كەلىسىم جاساسپايتىنى تۇسىنىكتى. ال رەسەيمەن دوستىعىن ءجيى ايتىپ جۇرگەن قازاقستان ۇلىبريتانيامەن ىنتىماقتاستىق ورناتىپ وتىر» دەپ جازدى كاندەلاكي.

ول قازاقستاننىڭ ارەكەتىن ۆەنگريا نەمەسە سلوۆاكيانىڭ رەسەيگە كوزقاراسىمەن سالىستىرىپ، بۇل ەلدەر ەۋرووداقتان رەنجىسە دە، ماسكەۋمەن اسكەري كەلىسىمگە بارمايتىنىن مىسال ەتتى.

كاندەلاكيدىڭ ەڭ وتكىر ءسوزى:

"ءبارى وسىلاي باستاعان. سوڭىندا قينالىپ قالعان. ءبىراق قازاقستاندا تاريح وقىلمايدى-اۋ دەيمىن. بالكىم، جاي عانا ويدان شىعارىلادى»"

ايتا كەتەيىك، تينا كاندەلاكي بۇعان دەيىن دە قازاقستانداعى ورىس ءتىلىنىڭ شەتتەتىلۋى تۋرالى سىني پىكىر بىلدىرگەن. ول بىرنەشە تەمىرجول بەكەتتەرىنىڭ قازاقشالانۋىنا قارسى شىققان بولاتىن.

وسىعان جاۋاپ رەتىندە ساتيرالىق Qaznews24 پاراقشاسى «ەي، يوۋ، ورىستار» ءانىن قويىپ پوست جاريالاعان ەدى. پاراقشا اۆتورى تەمىرلان ەڭسەبەككە 17 قاڭتاردا ۇلتارالىق ارازدىق قوزدىردى دەگەن ايىپ تاعىلعان.