پرەزيدەنتتىڭ ايتۋىنشا وسى قاعيداتتى ءىس جۇزىندە ورىنداۋ ءۇشىن ماڭىزدى شارالار قابىلداندى. اتا-انا، مەكتەپ جانە مەملەكەت كۇش جۇمىلدىرىپ، بالا تاربيەسىنە باسا ءمان بەرگەنى ءجون. بۇل تۋرالى مەملەكەت باسشىسى قاسىم-جومارت توقايەۆ كونستيتۋسيانىڭ 30 جىلدىعىنا ارنالعان حالىقارالىق عىلىمي-پراكتيكالىق كونفەرەنسيادا ايتتى، دەپ حابارلايدى اقوردا.
پرەزيدەنتتىڭ ايتۋىنشا مەكتەپ قابىرعاسىندا، جوعارى وقۋ ورىندارىندا قۇقىقتىق تاربيە جۇمىسىن كۇشەيتۋ قاجەت.
"بالالارعا زاڭداردى قاراپايىم تىلمەن تۇسىندىرگەن ابزال. بۇقارالىق اقپارات قۇرالدارى مەن الەۋمەتتىك جەلى ارقىلى ءتيىستى جۇمىس جۇرگىزىلۋى كەرەك. جاستاردىڭ قۇقىقتىق ساناسىنا وتباسىنداعى تاربيە دە زور ىقپال ەتەدى. مۇنى ەشقاشان ۇمىتپاۋىمىز كەرەك"، - دەدى توقايەۆ.
ونىڭ ايتۋىنشا اتا-انا، مەكتەپ جانە مەملەكەت كۇش جۇمىلدىرىپ، بالا تاربيەسىنە باسا ءمان بەرگەنى ءجون. سوندا عانا زاڭعا باعىناتىن، ءوزىنىڭ دە، وزگەنىڭ دە قۇقىعىنا قۇرمەتپەن قارايتىن ۇرپاق تاربيەلەيمىز. زاڭ مەن ءتارتىپ – ادىلەتتى قازاقستاندى قۇرۋدىڭ باستى العىشارتى.
"جالپى ايتقاندا، ءبىز مەملەكەتتىك ساياساتتا تەرەڭ وزگەرىس جاسادىق. كونستيتۋسيالىق رەفورما وسى اۋقىمدى جۇمىستىڭ بەرىك قۇقىقتىق ارقاۋى بولدى. سول ارقىلى ساياساتتا، ەكونوميكادا، الەۋمەتتىك سالادا، سوت جۇيەسىندە "ادىلەتتى مەملەكەت" قاعيداتىن جۇزەگە اسىرۋعا جول اشىلدى"، - دەيدى مەملەكەت باسشىسى.
توقايەۆ كونستيتۋسيادا جەر جانە بارلىق تابيعي رەسۋرس حالىققا تيەسىلى ەكەنى ايقىن كورسەتىلگەنىن اتاپ ءوتتى.
"وسى قاعيداتتى ءىس جۇزىندە ورىنداۋ ءۇشىن ماڭىزدى شارالار قابىلداندى. مەنىڭ تاپسىرماممەن "ۇلتتىق قور – بالالارعا" باعدارلاماسى ازىرلەندى. قوردىڭ جىل سايىنعى ينۆەستيسيالىق تابىسىنىڭ جارتىسى بالالاردىڭ ارنايى ەسەپشوتىنا جىبەرىلەتىن بولدى"، - دەدى پرەزيدەنت.
