قىتايداعى قازاق دارىگەرى جاسارات جالەل ۇلى تابانى 17  جىل بويى جەرگە تيمەگەن الحار ەسىمدى جىگىتتى اياققا تۇرعىزعان. تاعى ءبىر ەڭبەكتەپ كەلگەن كىسىنىڭ ەڭسەسىن تۇزەپتى. ناۋقاستىڭ ءوزى قالاي ءجۇرىپ كەتكەنىن ايتىپ قۋانىپ تۇر. بىرنەشە جىل بۇرىن سىنعان قولىنا قايتا وتا جاساتۋعا كەلگەن ازاماتقا وزگە دارىگەرلەر «اياعىن كەسەمىز» دەگەن. ال جاسارات دارىگەر ناۋقاستىڭ قارايا باستاعان سۇيەگىن امان الىپ قالعان. ءقازىر قۋانىشتان سەكىرىپ ويناپ ءجۇر. 

بۇل – ءالماتى-ۇرىمشى ساپارىندا سۇحبات العان جاسارات جالەل ۇلىنىڭ الدىنا ەم ىزدەپ بارعان ناۋقاستاردىڭ قىسقاشا وقيعاسى. وسىدان 11 جىل بۇرىن قىتايداعى قازاق دارىگەرى تۋرالى “قامشى” پورتالى كولەمدى ماتەريال ازىرلەگەن ەدى. ءالى كۇنگە دەيىن جاسارات دارىگەردى ىزدەيتىن وقىرماندارىمىزدىڭ  ءوتىنىشىن ارقالاپ، قىتايعا قايتا باردىق. 

جاسارات جالەل ۇلى – زاماناۋي مەديسيناعا بىرنەشە ەمدەۋ ءتاسىلىن ەنگىزگەن  بىلىكتى دارىگەر. ونىڭ كەيبىر ءادىسى امەريكادا پاتەنتتەلگەن. ول كيىز ءۇي فورمالدى وتا جاساۋ، قازاقى ساپتاما ەتىكپەن وكشە تارامىسىنىڭ ءۇزىلۋىن پىشاق تيگىزبەي ەمدەۋ سەكىلدى مەديسينالىق تىڭ ادىس-تاسىلدەردى ويلاپ تاپقان. بۇدان بولەك ۇرشىعى شىققان بالالاردى گيپسقا بايلاماستان وز-وزىنەن ەمدەلۋىنە مۇمكىندىك بەرەتىن تاعى ءبىر قۇرال شىعارعان. 

بايقاساڭىز، جاسارات جالەل ۇلىنىڭ مەديسيناعا ەنگىزگەن ءار تاسىلىنەن قازاقتىڭ ءيىسى شىعىپ تۇرادى. زامان دامىعان سايىن ىزدەنۋىن توقتاتپاعان قىتايداعى قازاق دارىگەرى تۋرالى ارنايى رەپورتاجدى سىلتەمەگە ءوتىپ كورىڭىزدەر.