قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ تورعاي، ارقالىق وڭىرلەرى ارقىلى ءوتىپ، استانا مەن باتىس ايماقتاردىڭ اراسىنداعى جول ۋاقىتىن قىسقارتۋدى كوزدەيتىن ستراتەگيالىق ماڭىزى بار جوبانى تىكەلەي باقىلاۋعا العانى، ءسوز جوق، قولدايتىن باستاما. تورعاي وڭىرىندەگى ءۇش اۋدان، ارقالىق قالاسى دامۋ كوشىنەن كەيىن قالماسىن دەسەك، ۇلكەن جولدىڭ ءتۇسۋى – ءبىرىنشى كەزەكتەگى مىندەت.

وسى تورعاي ءوڭىرىن تۇلەتە وتىرىپ، استانا مەن باتىس ايماقتاردى تىكەلەي بايلانىستىرىپ، ناتيجەسىندە 700 شاقىرىمعا دەيىن جول قىسقارتاتىن جوبانىڭ باعىتتارى ەل اراسىندا داۋ تۋعىزدى.

بۋرابايدا وتكەن ءتورتىنشى ۇلتتىق قۇرىلتايدا پرەزيدەنت قاسىم-جومارت توقايەۆ «وسى تۇستا تاعى ءبىر ماڭىزدى ينفراقۇرىلىمدىق جوبا قولعا الىناتىنى تۋرالى جاريالاعىم كەلەدى. مەن ۇكىمەتكە استانادان ارقالىق، تورعاي جانە ىرعىز ارقىلى ترانسكاسپيي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردىم. جاڭا كۇرەجول ورتالىق جانە باتىس ايماقتاردىڭ اراسىن 560 شاقىرىمعا قىسقارتادى. بۇل – تۇتاس تورعاي ءوڭىرىنىڭ دامۋىنا تىڭ سەرپىن بەرەتىن اۋقىمدى جوبا»، – دەپ ارنايى تاپسىرما بەرگەن بولاتىن.

ارتىنشا قوستاناي وبلىسىنىڭ اكىمى قۇمار اقساقالوۆ پەن سول كەزدەگى كولىك ۆيسە-مينيسترى ءساتجان ابلالييەۆ ترانسكاسپيي حالىقارالىق كولىك دالىزىنە شىعاتىن «ورتالىق-باتىس» اۆتوجولىنىڭ استانا-ەگىندىكول-باۋمانسكوە-سوچينسكوە-شالعاي شويىندىكول-ارقالىق-جالداما-امانگەلدى-تورعاي-اقشىعاناق-ىرعىز باعىتى قۇرىلىسىنىڭ باستالعانىن حابارلاپ، لەنتاسىن قيعان. ءبىراق كولىك مينيسترلىگى تاراپىنان كوميسسيا قۇرىلىپ، جول جوباسىنىڭ ساراپتاما دەڭگەيىندە ەكەنىن، باعىتتاردى ايقىنداۋ ءۇشىن حالىقپەن كەزدەسۋلەر وتكىزىلىپ جاتقانى تۋرالى اقپارات تارادى.

«ايقىن» گازەتىندە وسى ماسەلە كوتەرىلگەندە كولىك ۆيسە-مينيسترى ماقسات قالياقپاروۆ مەملەكەت باسشىسىنىڭ تاپسىرماسى بولەك ورىندالاتىنىن، سونداي-اق بۇل اۆتوجول ۇلىتاۋ وبلىسىنا بۇرمالانبايتىنىن، «استانا – ۇلىتاۋ» باعىتى بويىنشا دەربەس جوبا ازىرلەنىپ جاتقانىن ايتقان-دى.

بۇگىن ق ر پرەزيدەنتىنىڭ كومەكشىسى – باسپا ءسوز حاتشىسى رۋسلان جەلدىباي مەملەكەت باسشىسىنىڭ ۇكىمەتكە ءدال وسى «تورعاي – ىرعىز» اۆتوجولىنىڭ قۇرىلىسىن جەدەلدەتۋدى تاپسىرعانىن جاريالادى.

يگى جوبانى جۇزەگە اسىراتىن اسا ماڭىزدى پرەزيدەنت باستاماسىنىڭ ورىندالۋىنا قانداي كەدەرگىلەر بار؟ جوبالاۋ-سمەتالىق قۇجاتتاما بەكىتىلگەن جوبا بويىنشا عانا ازىرلەنبەۋشى مە ەدى؟ قارجىلاندىرۋ كوزى قانداي جانە جوبا مەرزىمى قانداي؟ ۇلى ءىستىڭ اينالاسىنداعى اقپارات جۇرتقا قولجەتىمدى بولسا، ەشكىم سىرتتان تون پىشپەي، تىلەۋلەستىك تانىتار ەدى-اۋ...