مەملەكەت باسشىسىنىڭ بيىلعى جولداۋىندا ايتىلعان قازاقستاندى ودان ءارى جاڭعىرتۋدىڭ جاڭا قادامدارى ە.قارين بايانداماسىنىڭ نەگىزگى وزەگى بولدى. بۇل ەڭ الدىمەن ەكونوميكانىڭ ءتۇرلى سالالارىنا جاساندى ينتەللەكتىنى جاپپاي ەنگىزۋ جانە سيفرلاندىرۋدى كەڭ كولەمدە دامىتۋدى قامتيدى. قازاقستان بولاشاقتا تەحنولوگيالىق تۇرعىدان دامىعان مەملەكەت اتانۋدى كوزدەيدى.
– قازاقستان سيفرلاندىرۋ مەن جاساندى ينتەللەكت قۇرالدارىن جەدەلدەتىپ ەنگىزۋدە كەشەندى ءارى جۇيەلى شەشىمدەر قابىلداعان الەمدەگى العاشقى ەلدەردىڭ ءبىرى بولىپ وتىر. قازاقستان پرەزيدەنتى سيفرلىق ترانسفورماسيا مەن جاساندى ينتەللەكتىنى ەنگىزۋدى جاڭا ۇلتتىق يدەيا رەتىندە ايقىنداپ بەردى، – دەدى ەرلان قارين.
وسى ورايدا مەملەكەتتىك كەڭەسشى يۋنەسكو-نىڭ جاساندى ينتەللەكت ەتيكاسىن قالىپتاستىرۋداعى جەتەكشى ءرولىن قولدايتىنىن جەتكىزدى. سونداي-اق قازاقستاندا يۋنەسكو (RAM) ادىستەمەسىنە سايكەس جاساندى ينتەللەكت ەتيكاسى مەن ونى دامىتۋ جونىندە زەرتتەۋ جۇرگىزىلىپ جاتقانىن حابارلادى.
بۇعان قوسا ەرلان قارين جولداۋدا جاريالانعان ءبىر پالاتالى پارلامەنتكە كوشۋدى ءارى ونى پروپورسيونالدى جۇيە بويىنشا قالىپتاستىرۋدى كوزدەيتىن ساياسي جاڭعىرتۋ ۇدەرىسىنىڭ ماقساتتارى مەن سيپاتى تۋرالى ايتتى.
– قازاقستانداعى پارلامەنتتىك رەفورمانىڭ ماقساتى – ساياسي جۇيەنىڭ ينستيتۋسيونالدىق نەگىزدەرىن ودان ءارى نىعايتۋ. ناتيجەسىندە پارتيالاردىڭ ءرولى كۇشەيىپ، قوعامدىق-ساياسي ۇدەرىستەرگە قاتىسۋى ارتادى. جالپى، پارلامەنتتىك رەفورما قازاقستانداعى ساياسي جاڭعىرۋدىڭ كەزەكتى كەزەڭى بولىپ سانالادى، – دەدى مەملەكەتتىك كەڭەسشى.
باس كونفەرەنسياعا ۇيىمنىڭ 193 مۇشە مەملەكەتىنەن دەلەگاسيالار قاتىسۋدا، ونىڭ ىشىندە ۇكىمەت باسشىلارى، مينيسترلەر، عالىمدار مەن مادەنيەت قايراتكەرلەرى، ديپلوماتتار، ساراپشىلار جانە باسقالار بار.
