الماتىنىڭ وڭىرلىك كوممۋنيكاسيالار قىزمەتىندە قالا اكىمىنىڭ ورىنباسارى نۇرلان ءابدىراحىم حالىقتىڭ از قامتىلعان جانە وسال توپتارىن الەۋمەتتىك قولداۋ شارالارىنا ارنالعان باسپا ءسوز ءماسليحاتىن وتكىزدى. مەگاپوليستە تۇرمىسى تومەن وتباسىلاردى انىقتاۋ بويىنشا كەشەندى جۇمىس جۇرگىزىلىپ كەلەدى. «سيفرلىق وتباسى كارتاسى» پلاتفورماسى ارقىلى 1819 وتباسىعا (9063 ادام) جالپى سوماسى 755 ميلليون تەڭگەگە اتاۋلى الەۋمەتتىك كومەك كورسەتىلدى.
اكىمنىڭ ورىنباسارى قالانىڭ الەۋمەتتىك ساياساتى تەك قارجىلىق قولداۋمەن شەكتەلىپ قالمايتىنىن، سونىمەن قاتار ەڭبەك بەلسەندىلىگىن ىنتالاندىرۋعا جانە وتباسىن دەربەس قامتاماسىز ەتۋگە باعىتتالعانىن اتاپ ءوتتى.
"بيىل 12،2 ملرد تەڭگە سوماسىنا 33 مىڭنان استام مۇمكىندىگى شەكتەۋلى ادام وڭالتۋ قۇرالدارىمەن جانە الەۋمەتتىك قىزمەتتەرمەن قامتىلدى. قوسىمشا 277 ادام 1،3 ملرد تەڭگەگە يننوۆاسيالىق تەحنيكالىق قۇرالدارمەن قامتاماسىز ەتىلەدى"، - دەدى نۇرلان ءابدىراحىم.
الەۋمەتتىك قورعاۋدى دامىتۋدىڭ ۇلتتىق عىلىمي ورتالىعىمەن بىرلەسىپ 2026 جىلى وڭالتۋدىڭ تەحنيكالىق قۇرالدارىن جەكە ىرىكتەۋ جۇيەسىن ەنگىزۋ جوسپارلانىپ وتىر، بۇل ولاردىڭ ەرەكشەلىكتەرى مەن مەديسينالىق كورسەتكىشتەرىن ەسكەرۋگە مۇمكىندىك بەرەدى.
"ينۆاتاكسي" قىزمەتى دە دامىپ كەلەدى. قىزمەتتى قارجىلاندىرۋ ماشينالار پاركىن 145 بىرلىككە دەيىن ۇلعايتۋعا مۇمكىندىك بەردى، وسى جوبانىڭ ارقاسىندا "ياندەكس تاكسي" اگرەگاتورى ارقىلى پايدالانۋشىلاردى قامتۋ 2 مىڭنان 3،4 مىڭ ادامعا دەيىن ءوستى. 2026 جىلدان باستاپ قىزمەتتى II جانە III دارەجەلى اۋىر پسيحيكالىق اۋىتقۋشىلىعى بار ادامدار دا پايدالانا الادى. قىزمەت كورسەتۋ ساپاسىن ارتتىرۋ ءۇشىن سيفرلىق فورماتتا وتىنىمدەر مەن مارشرۋتتاردى باقىلاۋعا مۇمكىندىك بەرەتىن ديسپەچەرلىك قىزمەتتىڭ اۆتوماتتاندىرىلعان جۇيەسى ەنگىزىلىپ وتىر.
