اباي وبلىسىنىڭ اكىمى بەرىك ءۋالي اياگوز اۋدانى تۇرعىندارىمەن كەزدەسۋدە اياگوز اۋدانىندا جۇمىس ىستەپ جاتقان شەت ەلدىك ازاماتتارعا قاتىستى پىكىر ءبىلدىردى. ولاردىڭ زاڭ اياسىندا ەڭبەك ەتىپ جۇرگەنىن، وبلىس ەكونوميكاسىنا ۇلەس قوسىپ جاتقانىن ايتتى.

«قىتايدان قاشپاۋىمىز كەرەك. بۇكىل الەم جۇڭگو ينۆەستيسياسىنا ءزارۋ، سوعان تالاسىپ جاتىر. ولار ءبىزدىڭ جولىمىزدى سالايىن دەپ جاتىر. ەگەر دە ولاردىڭ تالابىنا ساي جۇمىس ىستەي الاتىن بولسا، نەگە جەرگىلىكتى مامانداردى جۇمىسقا تارتپاسقا؟ تارتامىز. وزدەرىڭىز بىلەسىزدەر، «ومبى-مايقاپشاعاي» كۇرە جولىنىڭ «قالباتاۋ-مايقاپشاعاي» جولىن سالعان كەزدە 200-گە جۋىق جەرگىلىكتى تۇرعىن سول جەردە جۇمىس ىستەدى. قاراپايىم حالىقتى قىتايعا قارسى قويۋعا بولمايدى. جۇڭگو حالقى الەمنىڭ بارلىق ەلىندە جۇمىس ىستەپ ءجۇر. سوندىقتان قىتايدان قورىقپاۋىمىز كەرەك. ولار "اياگوز-باقتى" تەمىر جولىن سالۋعا قاتىسىپ جاتىر. كەرىسىنشە سىزدەر قىتايلارعا كومەكتەسىڭىزدەر. ولار جۇمىس ىستەۋگە كەلدى. قوناق ۇيدە تۇرماعاندا، قايدا تۇرادى؟! ولار قوناق ءۇيدىڭ يەسىنە اقشاسىن تولەپ، زاڭدى تۇردە تۇرىپ جاتىر. الداعى 2 جىل ىشىندە تەمىرجول سالىنادى، تەمىر جولدىڭ بويىنا باسقا دا ادامدار كەلەدى. ونىڭ ءبارى اقشا، ونىڭ ءبارى ءبىزدىڭ وبلىسىمىزدىڭ ەكونوميكاسىنا قۇيىلعان قارجى. ۇلكەن ينۆەستيسيا. ولاردى ءبىز قايتا تارتۋ كەرەكپىز. پرەزيدەنت قاسىم-جومارت توقايەۆ پەن جۇڭگو ەلىنىڭ باسشىسى سي سزينپينگە راحمەت، ەكى ەلدىڭ اراسىنداعى بارىس-كەلىستى ارتتىرۋ ءۇشىن ۆيزاسىز رەجيم جاسادى. سىزدەر دە قىتايعا بارىپ ساۋدا جاساڭىزدار. قىتايدىڭ تۋريستەرى وسىندا كەلىپ جاتىر. ءۇيىڭىزدىڭ قاسىنان سولارعا قىزمەت كورسەتەتىن ورىن اشىڭىز. قوي باعىڭىز، ءونىمىن وتكىزىڭىز. بيىل الاكولگە قانشاما قىتايلىق تۋريستەر كەلدى. ولار وسىندا قالىپ قويىپ جاتقان جوق قوي. كەلىپ، جۇمىس ىستەپ جاتىر. ءوزىڭىز دە قىتايعا، شەتەلگە باراسىز عوي. ولارعا جاعداي جاساپ، كەرەگىن وزىمىزگە الۋىمىز كەرەك. جاستاردى قىتايدان كەلگەن جۇمىسشىلارعا قارسى قويماي، كەرىسىنشە ولاردىڭ بىزگە ەڭبەك ەتۋگە كەلىپ جاتقانىن، ءبىزدىڭ جولىمىزدى سالىپ بەرەيىن دەپ جاتقانىن ءتۇسىندىرۋىمىز كەرەك. تەمىرجول سالىناتىن بولسا، ەل ەكونوميكاسىنا قانشاما قارجى قۇيىلادى. تەمىرجول اياگوزگە دەيىن كەلەتىن بولسا، ونىڭ كەلەسى كەزەڭى بار. اياگوزدەن قاراعاندىعا جول تارتىلادى. اياگوزدىڭ ەكىنشى، ءۇشىنشى تىنىسى سوندا اشىلادى»، - دەدى بەرىك ءۋالي.