ق ر پرەمەر-مينيسترىنىڭ ورىنباسارى - مادەنيەت جانە اقپارات ءمينيسترى ايدا بالايەۆا 2030 جىلعا دەيىنگى ميگراسيالىق ساياسات كونسەپسياسىنىڭ نەگىزگى باعىتتارىن تانىستىردى.
ەندى ميگرانتتار تەك ناقتى كادر تاپشىلىعى بار سالالارعا تارتىلاتىن بولادى، ال ولاردىڭ اعىمى ەل ەكونوميكاسى مەن وڭىرلەردىڭ قاجەتتىلىكتەرىنە سايكەس رەتتەلەدى.
«ميگراسيالىق زاڭداردى ساقتاۋ قاتاڭ باقىلانادى، ال زاڭ بۇزعاندار – ميگرانت تا، جۇمىس بەرۋشى دە – جاۋاپقا تارتىلادى. قاۋىپسىزدىك ەلگە كىرگەن ساتتەن باستاپ شىعۋعا دەيىن قامتاماسىز ەتىلۋى ءتيىس»، – دەدى مينيستر.
2026 جىلعى قاڭتاردان باستاپ، شەتەلدىكتەردىڭ تۇراقتى تۇرۋعا ءوتىنىش بەرۋى ءۇشىن الدىن الا باعالاۋ جۇيەسى ەنگىزىلەدى. ەتنيكالىق قازاقتارعا جەڭىلدىكتەر قاراستىرىلعان بولەك ءراسىم ازىرلەندى. بۇل ازاماتتار «قانداس» مارتەبەسىن الىپ، ەڭبەك تاپشىلىعى بار وڭىرلەرگە – اقمولا، اباي، قوستاناي، پاۆلودار، اتىراۋ، باتىس قازاقستان، شىعىس قازاقستان جانە سولتۇستىك قازاقستان وبلىستارىنا قونىستانادى.
قانداستار وڭىرلىك كۆوتا بويىنشا كوشكەن جاعدايدا بەس جىلدىق الەۋمەتتىك كەلىسىمگە قول قويادى. ەگەر بەلگىلەنگەن مەرزىمنەن بۇرىن كەتسە، العان قاراجاتتى قايتارۋعا مىندەتتى. سونىمەن قاتار، قاراپايىم كوشى-قون ءتارتىبى دە قولدانىلادى، ءبىراق ول جەڭىلدىكتەر مەن قولداۋسىز جۇزەگە اسادى.
ايدا بالايەۆا جاڭا ساياسات كەزەڭ-كەزەڭىمەن ەنگىزىلەتىنىن، وعان قوعام، بيزنەس پەن ايماقتاردان الىناتىن پىكىرلەر ەسكەرىلەتىنىن اتاپ ءوتتى.
«ميگراسيا تەك زاڭدى، رەتتەلگەن جانە ءقاۋىپسىز جاعدايدا عانا مەملەكەتتىڭ جانە ازاماتتاردىڭ مۇددەسىنە قىزمەت ەتەدى»، – دەپ قورىتىندىلادى ا. بالايەۆا.
