ۆەنەسۋەلا اقش-پەن مۇناي كەلىسىمىنە دايىن — ترامپ اكىمشىلىگى ەلدىڭ رەسۋرستارىنا تولىق باقىلاۋ ورناتاتىنىن مالىمدەدى.
ۆەنەسۋەلانىڭ ۋاقىتشا پرەزيدەنتى دەلسي رودريگەس اقش-پەن مۇناي سالاسىندا كەلىسىم جاساۋ مۇمكىندىگىن قورعاپ، ۆاشينگتونمەن ەنەرگەتيكالىق ىنتىماقتاستىققا اشىق ەكەنىن مالىمدەدى. ونىڭ ايتۋىنشا، اقش-تىڭ بۇرىنعى پرەزيدەنت نيكولاس مادۋرونى بيلىكتەن كۇشپەن كەتىرۋى ەكى ەل اراسىنداعى قاتىناستارعا «داق تۇسىرگەنىمەن»، امەريكامەن ساۋدا جاساۋ توسىن جاعداي ەمەس.
بۇل مالىمدەمە ترامپ اكىمشىلىگى ۆەنەسۋەلا مۇنايىنا تىكەلەي باقىلاۋ ورناتۋعا كوشكەنىن مالىمدەگەن تۇستا ايتىلدى. وسى اپتادا اقش سانكسيالانعان ەكى مۇناي تانكەرىن تاركىلەپ، بولاشاقتا ۆەنەسۋەلادان وندىرىلەتىن مۇنايدىڭ بارلىق ساتىلىمىن ءوزى باسقاراتىنىن حابارلادى.
اقش-تىڭ ەنەرگەتيكا ءمينيسترى كريس رايتتىڭ ايتۋىنشا، ۆاشينگتون ۆەنەسۋەلادان شىققان مۇنايدى حالىقارالىق نارىقتا ءوزى وتكىزەدى جانە بۇل باقىلاۋ ۇزاق مەرزىمگە جالعاسادى.
ال ۆيسە-پرەزيدەنت دجەي دي ۆەنس ۆەنەسۋەلا مۇنايىن ساتۋ اقش-تىڭ ۇلتتىق مۇددەسىنە ساي بولعان جاعدايدا عانا مۇمكىن بولاتىنىن اشىق ايتتى. ونىڭ سوزىنشە، ۆەنەسۋەلا ءوز رەسۋرستارىن تەك امەريكا تالاپتارىنا سايكەس پايدالانا الادى.
وسى اپتادا دونالد ترامپ ۆەنەسۋەلا مۇنايىنا قول جەتكىزۋگە ارنالعان 2 ميلليارد دوللارعا دەيىنگى كەلىسىم جاريالاپ، ەل بيلىگى اقش كومپانيالارىنا نارىقتى اشۋعا ءماجبۇر ەكەنىن اڭعارتتى. ايتپەسە، جاڭا اسكەري قىسىم بولۋى مۇمكىن ەكەنىن دە جاسىرمادى.
اق ءۇيدىڭ مالىمەتىنشە، ۆەنەسۋەلاعا كىرىپ-شىعاتىن مۇناي تاسىمالى تەك اقش ماقۇلداعان ارنالار ارقىلى جۇزەگە اسادى. بۇل — الەمدەگى ەڭ ءىرى دالەلدەنگەن مۇناي قورىنا يە ەلدىڭ ەنەرگەتيكالىق سەكتورىنا بۇرىن-سوڭدى بولماعان دەڭگەيدە باقىلاۋ ورناتۋ دەگەن ءسوز.
ترامپ ۆەنەسۋەلا مۇنايىنان تۇسكەن تابىسقا ەلدىڭ تەك امەريكالىق ونىمدەردى عانا ساتىپ الاتىنىن دا مالىمدەدى. الداعى كۇندەرى ول اق ۇيدە ءىرى مۇناي كومپانيالارىنىڭ باسشىلارىمەن كەزدەسىپ، ۆەنەسۋەلادا ءوندىرىستى ارتتىرۋ جولدارىن تالقىلايدى.
Financial Times باسىلىمىنىڭ حابارلاۋىنشا، امەريكالىق مۇناي الپاۋىتتارى ۆەنەسۋەلاعا ءىرى ينۆەستيسيا سالۋ ءۇشىن ۆاشينگتوننان قاتاڭ قۇقىقتىق جانە قارجىلىق كەپىلدىكتەر تالاپ ەتىپ وتىر.
ساراپشىلار بۇل جاعدايدى اقش-تىڭ لاتىن امەريكاسىنداعى ىقپالىن كۇشەيتۋ عانا ەمەس، جاھاندىق مۇناي نارىعىنا اسەر ەتەتىن جاڭا گەوساياسي كەزەڭنىڭ باستالۋى دەپ باعالاپ وتىر.
