وسىعان بايلانىستى ەۇۋ-دىڭ ساپانى قامتاماسىز ەتۋ جانە ىشكى باقىلاۋ جونىندەگى پرورەكتورى – باسقارما مۇشەسى ينديرا رىستينا ءوز پىكىرىن ءبىلدىردى.
بۇگىن مەملەكەت باسشىسى قاسىم-جومارت توقايەۆتىڭ «Turkistan» گازەتىنىڭ باس رەداكتورى، بەلگىلى اقىن، پۋبليسيست باۋىرجان باباجانۇلىنا بەرگەن كەڭ كولەمدى سۇحباتى جاريالاندى.
وسىعان بايلانىستى ەۇۋ-دىڭ ساپانى قامتاماسىز ەتۋ جانە ىشكى باقىلاۋ جونىندەگى پرورەكتورى – باسقارما مۇشەسى ينديرا رىستينا ءوز پىكىرىن ءبىلدىردى.
"پرەزيدەنتتىڭ جىل باسىنداعى سۇحباتى ەل دامۋىنىڭ جاڭا كەزەڭىندەگى باستى تالاپتى ايقىن كورسەتەدى. بۇل – رەفورمالاردىڭ ساپالى ورىندالۋى.
مەملەكەت كوپتەگەن باعىت بويىنشا ينستيتۋسيونالدىق نەگىزدى قالىپتاستىردى، ەندىگى كەزەڭدە سول نەگىزدىڭ ناقتى ناتيجەگە اينالۋى شەشۋشى مانگە يە.
بۇل ساپا لوگيكاسى بارلىق سالاعا ورتاق.
ەكونوميكادا – ءادىل ەرەجەلەر مەن جاۋاپتى سالىق ساياساتى، الەۋمەتتىك سالادا – اتاۋلى ءارى ءتيىمدى قولداۋ، سيفرلاندىرۋدا – قىزمەت ساپاسى مەن دەرەكتەر قاۋىپسىزدىگى، ءبىلىم مەن عىلىمدا – مازمۇن، ناتيجە جانە ادالدىق.
پرەزيدەنت سۇحبات بارىسىن بىرنەشە رەت اتاپ وتكەن «زاڭ مەن ءتارتىپ» قاعيداتى وسىنىڭ بارلىعىن بىرىكتىرەتىن وزەك رەتىندە قاراستىرىلعان. ءتارتىپ پەن جاۋاپكەرشىلىك جوق جەردە ساپا دا ورنىقپايتىنى ايتپاسا دا بەلگىلى دۇنيە.
الداعى رەفەرەندۋم مەن كونستيتۋسيالىق وزگەرىستەر دە باسقارۋ جۇيەسىنىڭ ساپاسىن ارتتىرۋعا باعىتتالعان. بۇل قادام وكىلدى بيلىكتىڭ تيىمدىلىگىن كۇشەيتىپ، قابىلداناتىن شەشىمدەردىڭ كاسىبيلىگى مەن سالماعىنا دەگەن تالاپتى ارتتىرۋدى كوزدەيدى.
پارلامەنتتىڭ ءرولى دە ءدال وسى ساپا ولشەمىمەن باعالانۋى ءتيىس، ياعني، زاڭ شىعارۋ ۇدەرىسىنىڭ مازمۇنى، قوعامدىق ديالوگتىڭ دەڭگەيى جانە جاۋاپكەرشىلىك مادەنيەتى شەشۋشى مانگە يە بولۋى كەرەك.
ءبىلىم بەرۋ سالاسىندا دا ساپا ماسەلەسى ەرەكشە وزەكتى. ويتكەنى ءدال وسى سالا بولاشاقتاعى مەملەكەتتىك اپپاراتتىڭ، ەكونوميكانىڭ، عىلىم مەن قوعامدىق ينستيتۋتتاردىڭ كادرلىق نەگىزىن قالىپتاستىرادى.
سوڭعى جىلدارى مەملەكەت ءبىلىم-عىلىم سالاسىن دامىتۋ ءۇشىن ناقتى قادامدار جاسادى. 2025-2026 وقۋ جىلىنا 93 مىڭنان استام ءبىلىم بەرۋ گرانتى ءبولىندى، «كەلەشەك» ءبىرىڭعاي جيناقتاۋ جۇيەسى ىسكە قوسىلىپ، وندا 130 مىڭنان استام سالىم اشىلدى، ستۋدەنتتەرگە ارنالعان جاتاقحانالار سالۋ قارقىنى ارتتى. بۇل – مەملەكەتتىڭ ءوز مىندەتىن ورىنداپ وتىرعانىنىڭ ايقىن دالەلى.
الايدا جاڭا كەزەڭدە باستى ولشەم – ءبىلىمنىڭ ساپاسى. ۋنيۆەرسيتەتتەردە وقىتۋ مازمۇنىنىڭ وزەكتىلىگى، ءادىل باعالاۋ، اكادەميالىق ادالدىق، ستۋدەنتتىڭ ناقتى قۇزىرەتتەرى مەن ەڭبەك نارىعىنا دايىندىعى رەفورمالاردىڭ شىنايى ناتيجەسىن كورسەتەدى.
بۇل تالاپ، اسىرەسە ستراتەگيالىق سالالار ءۇشىن ماڭىزدى. ماسەلەن، اتوم ەنەرگەتيكاسىن دامىتۋ تۋرالى شەشىمدەر قابىلدانعان جاعدايدا، اڭگىمە تەك ينفراقۇرىلىم تۋرالى ەمەس، جوعارى بىلىكتى، جاۋاپكەرشىلىگى جوعارى ينجەنەرلىك كادرلاردى دايارلاۋ تۋرالى بولۋعا ءتيىس. مۇنداي سالالاردا ساپا – قاۋىپسىزدىك پەن ۇلتتىق مۇددەنىڭ تىكەلەي كەپىلى.
عىلىم سالاسىندا دا مەملەكەت تاراپىنان جۇيەلى قولداۋ كورسەتىلىپ وتىر.
2025 جىلى عىلىمي جوبالاردى كوممەرسيالاندىرۋ بويىنشا 62 جاڭا شارت جاسالىپ، جالپى 267 جوبا ىسكە اسىرىلۋ ساتىسىندا، جەكە ينۆەستيسيالار كولەمى 20،4 ملرد تەڭگەگە جەتتى. سونىمەن قاتار 2024-2025 جىلدارى 576 جاس عالىمعا تۇرعىن ءۇي كىلتى تابىستالدى.
ەندىگى مىندەت – وسى قولداۋدى ساپالى عىلىمي ناتيجە مەن ناقتى قولدانبالى اسەرگە اينالدىرۋ.
پرەزيدەنت سۇحباتىندا تاريح عىلىمىنا قاتىستى ايتىلعان ويلار دا ساپا ۇعىمىمەن تىكەلەي بايلانىستى. تاريحتى تانىمالدىق ءۇشىن بۇرمالاۋ – قوعامنىڭ ينتەللەكتۋالدىق دەڭگەيىن السىرەتەدى. سوندىقتان، تاريح دەرەككە، عىلىمي ادىسكە جانە كاسىبي جاۋاپكەرشىلىككە سۇيەنۋگە ءتيىس. بۇل تالاپ ەڭ الدىمەن ۋنيۆەرسيتەت پەن عىلىمي ورتادا بەرىك ورنىعۋى قاجەت.
ءدال وسى ءتاسىل تۋريزم سالاسىنا دا قاتىستى. ءتۋريزمدى دامىتۋ تەك كەلۋشىلەر سانىن ارتتىرۋمەن ولشەنبەۋى كەرەك. نەگىزگى مىندەت – ساپالى تۋريستىك مارشرۋتتار، مازمۇندى مادەني جانە تاريحي باعىتتار، سەرۆيستىڭ دەڭگەيى مەن قاۋىپسىزدىگى. تۋريزم كاسىبي، ويلاستىرىلعان، ۇزاقمەرزىمدى ستراتەگيا ارقىلى عانا ەكونوميكانىڭ ناقتى درايۆەرىنە اينالادى.
سيفرلاندىرۋ مەن جاساندى ينتەللەكت ماسەلەسى دە ءدال وسى ساپا تۇرعىسىنان قاراستىرىلدى.
مەملەكەت باسشىسىنىڭ 2026 جىلدى سيفرلاندىرۋ جانە جاساندى ينتەللەكت جىلى دەپ جاريالاۋى – تەحنولوگيانى جاپپاي ەنگىزۋ ءۇشىن عانا ەمەس، وعان سانالى، جاۋاپتى جانە ساپالى تۇردە دايىندالۋ ءۇشىن بەرىلگەن ۋاقىت. جاساندى ينتەللەكتىنى ويلانباي قولدانۋ ۇلكەن تاۋەكەلدەرگە اكەلۋى مۇمكىن. سونىڭ كەسىرىنەن سىني ويلاۋ قابىلەتى السىرەپ، دايىن جاۋاپقا ۇيرەنگەن، ءوز بەتىنشە ويلاي المايتىن ۇرپاق قالىپتاسۋ ءقاۋپى بار. سوندىقتان باستى مىندەت – بارلىق دەڭگەيدە يي قۇرالدارىن دۇرىس پايدالانۋ مادەنيەتىن قالىپتاستىرۋ، ونى ادامنىڭ ويلاۋىن الماستىراتىن ەمەس، دامىتاتىن قۇرالعا اينالدىرۋ.
ءبىز وزىق ويلى ەل بولامىز دەسەك، ءار ىسكە جاۋاپكەرشىلىكپەن قاراپ، ونى ساپالى ورىنداۋدى ۇلتتىق داعدىعا اينالدىرۋىمىز كەرەك!
قورىتىندى بىرەۋ: مەملەكەت باعىتتى بەلگىلەدى، رەفورمالاردى باستادى، رەسۋرستاردى ءبولدى. ەندى بارلىق سالادا قويىلعان مىندەتتەردى ساپالى ورىنداۋ قاجەت. ساپالى ءبىلىم، ساپالى عىلىم، ساپالى زاڭ، ساپالى تەحنولوگيا جانە ساپالى كادرلار عانا ەلدىڭ ورنىقتى دامۋىن قامتاماسىز ەتە الادى"، – دەيدى ول.
