ۋكراينا پرەزيدەنتى ۆلاديمير زەلەنسكيي جاڭا جىلعا ارنالعان ۇندەۋىندە رەسەيمەن سوعىستى توقتاتۋعا باعىتتالعان بەيبىت كەلىسىمنىڭ 90%-ى دايىن ەكەنىن مالىمدەدى. ونىڭ ايتۋىنشا، قالعان 10% ۋكراينا مەن ەۋروپانىڭ بولاشاعىن ايقىندايدى.

زەلەنسكيي ۋكراينا «كەز كەلگەن شارتپەن ەمەس، ءادىل بەيبىتشىلىككە» ۇمتىلاتىنىن ايتىپ، دونباسس ايماعىنان باس تارتۋ ەلدىڭ جويىلۋىنا اكەلەتىنىن ەسكەرتتى. ءقازىر رەسەي دونەسك وبلىسىنىڭ شامامەن 75%-ىن، لۋگانسك وبلىسىنىڭ 99%-ىن باقىلاۋدا ۇستاپ وتىر.

ال رەسەي تاراپى ۋكراينا ءپۋتيننىڭ جەكە رەزيدەنسياسىنا درونمەن شابۋىل جاسادى دەپ ايىپتادى. كييەۆ بۇل مالىمدەمەنى جوققا شىعاردى، ال ەو وكىلدەرى ونى بەيبىت كەلىسسوزدەردى بۇزۋ ءۇشىن جاسالعان ارانداتۋ دەپ باعالادى.

ەۋروپا ەلدەرى 6 قاڭتاردا پاريجدە جينالىپ، ۋكرايناعا قاۋىپسىزدىك كەپىلدىكتەرىن تالقىلاماق. اقش تا ۇزاق مەرزىمدى قاۋىپسىزدىك كەپىلدىكتەرىن ۇسىنعانىن حابارلادى، الايدا كەلىسىمنىڭ ىسكە اسۋ مەرزىمى ءالى بەلگىسىز.