قىرعىز پرەزيدەنت اكىمشىلىگى كونستيتۋسياعا ءولىم جازاسىن ەنگىزۋگە مۇمكىندىك بەرەتىن وزگەرتۋلەر مەن تولىقتىرۋلار ەنگىزۋ تۋرالى زاڭ جوباسىن قوعامدىق تالقىلاۋعا شىعاردى. قۇجاتتا بالالاردى زورلاۋ جانە زورلاۋمەن بايلانىستى كىسى ءولتىرۋ ءۇشىن ءولىم جازاسىنا رۇقسات بەرۋ ۇسىنىلادى.

Kaktus.media-نىڭ حابارلاۋىنشا كونستيتۋسيانىڭ 25-بابىنىڭ ءبىرىنشى بولىگى جاڭا رەداكسيادا جازىلادى. وندا ءار ادامنىڭ ءومىر سۇرۋگە اجىراماس قۇقىعى ساقتالادى، ءبىراق قوسىمشا تارماق ەنگىزىلىپ، «ءولىم جازاسى تەك بالالاردى زورلاۋ جانە زورلاۋمەن ۇشتاسقان كىسى ءولتىرۋ ءۇشىن عانا قولدانىلۋى مۇمكىن» دەپ كورسەتىلەدى.

اتالعان زاڭ جوباسىنىڭ ماقساتى - «بالالار مەن ايەلدەردىڭ ءومىرى مەن دەنساۋلىعىنىڭ قاۋىپسىزدىگىن جانە قىلمىستىق شابۋىلداردان قورعالۋىن قامتاماسىز ەتۋ». 

ستاتيستيكالىق دەرەك بويىنشا 2024 جىلى ايەلدەر مەن بالالاردى ءولتىرۋ بويىنشا 43 قىلمىس تىركەلسە، 2025 جىلدىڭ سەگىز ايىندا 28. 2024 جىلى 107 زورلاۋ دەرەگى تىركەلگەن جانە ونىڭ 88ء-ى كامەلەتكە تولماعاندارعا قاتىستى بولعان.

زاڭ جوباسىن تالقىلاۋ koomtalkuu.gov.kg پورتالىندا باستالدى. مۇنداي زاڭ جوباسىن تالقىلاۋعا 17 جاستاعى ايسۇلۋدىڭ ءولىمى سەبەپ بولعان. بۇل وقيعا قوعامدا ۇلكەن رەزونانس تۋدىرعان بولاتىن. زاڭ جوباسىنا قاتىستى ساراپشىلار مەن الەۋمەتتىك جەلى قولدانۋشىلاردىڭ پىكىرى ەكىگە ءبولىندى. 

پرەزيدەنت سادىر جاپاروۆ بۇل ماسەلە تەك جالپىحالىقتىق داۋىس بەرۋ ارقىلى شەشىلۋى ءتيىس ەكەنىن مالىمدەدى.

ايتا كەتەيىك، قىرعىزستاندا ءولىم جازاسى بۇعان دەيىن بولعان. الايدا 2007 جىلى بۇل جازا الىنىپ تاستالىپ، ورنىنا ءومىر بويىنا باس بوستاندىعىنان ايىرۋ جازاسى ەنگىزىلگەن ەدى.