قازاقستان بيۋدجەتىنە 2025 جىلى تريلليوننان اسا تەڭگە قايتارىلدى. قايدا كەتكەن قاراجاتتى، قانداي جەرلەر مەملەكەتكە وتكەنىن باس پروكۋرور بەرىك اسىلوۆ ءتۇسىندىردى.

ساندار: 470 ملرد تاركىلەندى، 193 ملرد ديۆيدەند تولەندى

اسىلوۆ X جەلىسىندەگى پاراعىندا مەملەكەت پايداسىنا 470 ملرد تەڭگە اقشا مەن مۇلىك تاركىلەنگەنىن حابارلادى. بۇل سوما بيۋدجەت قارجىسى، مەملەكەتتىك ساتىپ الۋ، تابيعاتتى قورعاۋ، جەر قويناۋىن پايدالانۋ جانە جەردى ۇتىمدى يگەرۋ باعىتتارىندا انىقتالعان بۇزۋشىلىقتاردان قۇرالدى.

مەملەكەتتىك مۇلىكتى باسقارۋدىڭ زاڭدىلىعىنا جۇرگىزىلگەن ءبىر تەكسەرۋدىڭ ءوزى قارجى جانە ادىلەت مينيسترلىكتەرىمەن بىرلەسە وتىرىپ، ءۇش جىلدان اسا شوتتاردا «قاتىپ» تۇرعان 193 ملرد تەڭگە ديۆيدەند بيۋدجەتكە تولەنۋىن قامتاماسىز ەتتى.

جەر مەن ەكولوگيا: 800 مىڭ گەكتار جانە 25 ملرد وتەم

مەملەكەت يەلىگىنە 800 مىڭ گەكتار جەر قايتارىلدى. وعان الاتاۋ بوكتەرىندەگى، كاسپيي جاعالاۋىنداعى، بۋراباي ۇلتتىق پاركىنىڭ ماڭىنداعى ۋچاسكەلەر، سونداي-اق جىلدار بويى بوس جاتقان قوعامدىق جايىلىمدار مەن وزگە دە اۋىل شارۋاشىلىعى القاپتارى كىردى.

جايىلىم تاپشىلىعى ءبىرقاتار وڭىردە وسىلايشا جەڭىلدەدى، اۋىل تۇرعىندارىنىڭ ورتاق جەرلەرگە قولجەتىمدىگى قامتاماسىز ەتىلدى. «تازا قازاقستان» تۇجىرىمداماسى اياسىندا تابيعات پايدالانۋشىلار كەلتىرگەن 25 ملرد تەڭگە ەكولوگيالىق شىعىن وتەلدى.

سيفرلىق باقىلاۋ: 3،8 مىڭ قوقىس وشاعى جويىلدى، 300 مىڭ ءتۇپ وتىرعىزىلدى

سيفرلىق تەحنولوگيا، عارىشتىق مونيتورينگ جانە جاساندى ينتەللەكت كومەگىمەن ەكولوگتارمەن بىرلەسىپ 3،8 مىڭنان استام رۇقساتسىز قوقىس ءۇيىندىسى جويىلدى. پروكۋرورلىق قاداعالاۋ اكتىلەرى نەگىزىندە قۇرىلىس سالۋشالار 300 مىڭنان استام اعاش وتىرعىزدى.

ۇنەمدەۋ: 255 ملرد تەڭگە ءتيىمسىز شىعىننىڭ جولى كەسىلدى

مەملەكەتتىك باسقارۋدىڭ تيىمدىلىگىن ارتتىرۋ تۋرالى پرەزيدەنت جارلىعىن ورىنداپ، جەرگىلىكتى اتقارۋشى ورگانداردىڭ شىعىستارى وڭتايلاندىرىلدى. ءتيىمسىز جانە شامادان تىس جوسپارلار توقتاتىلىپ، 255 ملرد تەڭگە شىعىننىڭ الدىن الۋ مۇمكىن بولدى.

پاۆلودار مەن اتىراۋدا نارىقتان ءۇش ەسە قىمبات باعامەن ارنايى تەحنيكا مەن پاتەر ساتىپ الۋ جوسپارلارى پروكۋرورلارمەن كەرى قايتارىلدى. ۇنەمدەلگەن قاراجات الەۋمەتتىك مۇقتاجدارعا جانە ينفراقۇرىلىمعا باعىتتالدى.

سوت اكتىلەرى: 22 ملرد مەملەكەتكە، داۋلى 1،2 ملرد – جويىلدى

پروكۋرورلاردىڭ وتىنىشتەرى مەن نارازىلىقتارى بويىنشا 300-دەن استام ازاماتتىق جانە اكىمشىلىك ءىس قايتا قارالدى. مەملەكەت پايداسىنا 22 ملرد تەڭگە ءوندىرىلدى.

سونىڭ ىشىندە ەكى جەكە كومپانيانىڭ كرەديت بەرەشەگى ءۇشىن مەملەكەتتەن 1،2 ملرد تەڭگە ءوندىرۋ تۋرالى ورىنداۋ قۇجاتى جويىلدى. كەرىسىنشە، قورعانىس تاپسىرىسى بويىنشا ورىندالماعان قارۋ-جاراق جوندەۋ جۇمىستارى ءۇشىن 800 ملن تەڭگە ءوندىرىلدى.

كونتەكست

ەكونوميكالىق مۇددەنى قورعاۋداعى پروكۋرورلىق قاداعالاۋدىڭ تيىمدىلىگى جۇمىسقا سيفرلىق تەحنولوگيا مەن جاساندى ينتەللەكت ەنگىزىلۋىمەن ءوسىپ كەلەدى. 3 قاڭتاردا پرەزيدەنت قاسىم-جومارت توقايەۆ كونستيتۋسيالىق سوت شەشىمدەرىن ورىنداۋ جانە زاڭسىز الىنعان اكتيۆتەردى مەملەكەتكە قايتارۋ ماسەلەلەرى جونىندەگى زاڭعا قول قويدى.

بۇل تۋرالى Qamshy.kz اقپارات اگەنتتىگى حابارلايدى.