ءار ەكىنشى كىسى ءولتىرۋ ماس كۇيدە جاسالادى. الكوگولدى قىلمىستىڭ باستى قوزدىرعىشى دەپ اتاعان ءماجىلىس دەپۋتاتى ماگەررام ماگەرراموۆ ەلدە ساۋدانى قاتاڭ شەكتەۋدى ۇسىندى.

بۇل ۇسىنىستاردى دەپۋتات ءماجىلىس وتىرىسىندا ايتتى. ول مەملەكەت ەڭ قىمبات رەسۋرس – ادام الەۋەتىن الكوگول كەسىرىنەن جوعالتىپ وتىر دەدى.

ءىىم دەرەگىن دەپۋتات كەلتىردى: ەلدە ءار ەكىنشى كىسى ءولتىرۋ، ءار ءۇشىنشى زورلاۋ مەن بۇزاقىلىق ماس كۇيدە جاسالادى؛ ءار ءتورتىنشى توناۋ مەن جول اپاتى، ال وتباسىلىق-تۇرمىستىق زورلىق-زومبىلىقتىڭ جارتىسىنان كوبى الكوگولمەن بايلانىستى تىركەلەدى.

جاسوسپىرىمدەردىڭ ماس كۇيىندە قوعامدىق ءتارتىپ بۇزعانى تۋرالى اقپاراتتار ءجيى شىعادى دەدى ول. ساۋدا نۇكتەلەرىنىڭ «شەكتەن تىس كوبەيىپ كەتۋى» باقىلاۋدى السىرەتىپ وتىر دەدى.

ناقتى قادامدار قانداي بولماق؟

قحپ فراكسياسى الكوگول ساتاتىن نۇكتەلەر سانىن شەكتەۋدى جانە ءبىلىم بەرۋ، بالالار ۇيىمدارى ماڭىندا 100 مەترلىك تىيىم ايماعىن قايتا ەنگىزۋدى ۇسىندى.

الكوگولدى تەك ناقتى بەلگىلەنگەن ورىنداردا ساتۋ كەرەك، وزگە جەرلەردە ساتۋعا تولىق تىيىم سالۋ قاجەت دەدى دەپۋتات.

ۋاقىتتىق شەكتەۋ دا ۇسىنىلدى: دۇكەندەردە ساۋدانى 20:00-دەن كەيىن توقتاتۋ، كافە مەن مەيرامحانالاردا 22:00-دەن كەيىن بەرۋدى شەكتەۋ، ال ونلاين ساتۋدى مۇلدە توقتاتۋ كەرەك دەدى.

ماركىلەۋ جانە باقىلاۋ

الكوگول ءونىمىن مىندەتتى سيفرلىق ماركىلەۋگە ەنگىزۋ ۇسىنىلدى. بۇل كولەڭكەلى اينالىمدى ءدال قاداعالاۋعا جانە زاڭسىز ساتۋدى تەجەۋگە مۇمكىندىك بەرەدى دەدى ماگەرراموۆ.

بۇعان قوسا، ءىىم بۇعان دەيىن الكوگولدى تەك ارنايى دۇكەندەردە، شەكتەۋلى رەجيممەن ساتۋ ماسەلەسىن كوتەرگەن ەدى.

ايماقتارداعى تاجىريبە: «قۇرعاق» اۋىلدار

ەلدە 429 اۋىل الكوگولدەن تولىق باس تارتتى. اكتوبە وبلىسىندا 33 اۋىل ىشىمدىكتى توقتاتتى، قىزىلوردا وبلىسىندا 18 ەلدى مەكەن ترەزۆ ومىرگە كوشتى.

اتىراۋ وبلىسىنىڭ 53 اۋىلىندا سپيرتتىك ىشىمدىك ساتىلمايدى. ەكى جىل ىشىندە ول جەرلەردە قۇقىقبۇزۋشىلىق تىركەلمەدى، بۇل تاجىريبەنى ءوڭىردىڭ وزگە اۋماقتارىنا دا تاراتۋ جوسپارلانىپ وتىر.

قوعامدىق قاۋىپسىزدىك پەن ۇلتتىق دەنساۋلىق ءۇشىن جاۋاپكەرشىلىكتى كۇشەيتۋ كەرەك دەپ قورىتىندىلادى فراكسيا.

بۇل تۋرالى Qamshy.kz اقپارات اگەنتتىگى حابارلايدى.