باسىم بولىگى «نۇر وتاندىقتاردان» تۇراتىن پارلامەنت ءماجىلىسى كۇتىلگەندەي «ويلاماعان جەردەن» وزدەرىن تاراتىپ تىندى. پارتيا جەتەكشىسى مۇنى قولداپ، كەزەكتەن تىس سايلاۋ بەلگىلەدى. بۇگىن باس پارتيادان سول سايلاۋعا قوسىلاتىن ۇمىتكەرلەردىڭ دە ەسىمى بەلگىلى بولا باستادى.
ىشىندە كىمدەر جوق دەيسىز، شىركىن! ءانشى دە، سپورتشى دا، كاسىپكەر دە، اكىم دە، ءبارى بار. بولسىن. پارلامەنتتە تەك زاڭگەرلەر نەمەسە شەنەۋنىكتەر وتىرسىن دەگەن زاڭ جوق. ونداي تالاپ ەلدەگى باستى لاۋازىم پرەزيدەنتتىكە دە قويىلمايدى. ماسەلە، وسى ۇسىنىلىپ جاتقان ازاماتتاردى پارتيا تىزىمىنە، پارتيا بولعاندا دا قۇبىلۋ ەرەكشەلىگى ەشبىر تەورەمامەن ولشەنبەيتىن، باسىم داۋىس يەلەنۋ ىقتيمالدىعى وتە جوعارى ساياسي ۇيىمنىڭ تىزىمىنە قوسۋداعى ماقساتتا بولسا كەرەك. ويتكەنى، جوعارى جاقتاعىلارعا، قازاق بيلىگىن اشسا الاقانىندا، جۇمسا جۇدىرىعىندا ۇستايتىن ىقپالدى توپتارعا ويلاعانىن ىسكە اسىرۋعا كەدەرگى جاسايتىن، شىرىلداعان شىندىقتى ايتاتىن، بىلايشا ايتساق، قىرىق ادام ءبىر جاق بولىپ وتىرعاندا بۇرا تارتاتىن «قىڭىر» دەپۋتات ەش كەرەك ەمەس. ال، ۇكىمەت الپاۋىتتاردىڭ ارانىنا ىڭعايلاپ جاساپ اكەلگەن زاڭ جوباسىن ءۇنسىز ماقۇلداپ، الدىنداعى قاجەتتى تۇيمەنى باسىپ قانا وتىرا بەرەتىن دەپۋتاتتى قايدان تاباسىز؟ ارينە، اتاق-دارەجەسىن ايتپاعاندا، پايىم-پاراساتى، ومىرلىك تاجىريبەسى، قىزمەت جولى «حالىق قالاۋلىسى» دەگەن بۇل ابىرويلى ورىنعا لايىق ەمەس جانداردىڭ ىشىنەن تاباسىز! كەز-كەلگەن جەردە بىلىكتىلىگى تومەن ماماندى تۇقىرتىپ وتىرۋ وڭاي. ول باسشىنىڭ دا، باسقانىڭ دا ايتقانىنان شىقپايتىن بولادى. ويتكەنى، سەبەبى بەلگىلى - ايتاتىن ءسوزى، ءسوز تۇگىلى، قالىپتاسقان بەلگىلى-بىر ويى جوق. مىنا ءماجىلىستى دە الدەكىمدەر سونداي دەپۋتاتتاردان جاساقتاۋدى ءجون كورگەن سياقتى. ايتپەسە، سان سالالى ساياساتتى ايتپاعاندا، مۋزىكالىق ءبىلىمىنىڭ ءوزى تولىق ەمەس ءانشى مەن سپورتتى جارتى جولدان تاستاپ كەتىپ، شەنەۋنىك اتانعان «جۇلدىزداردى» ماجىلىسكە سۇيرەۋدىڭ قاجەتى نە ەدى؟
كەشەگى سايلاۋبەكتەي ديۋانا كەيىپتى پەندەلەردى ساياسات ساحناسىنا جاقىنداتۋ تۋرالى اڭگىمە دە وسىنداي ويدان تۋعان. سايلاۋبەك – قۇرال. كورنەكىلىك قۇرالى. حالىق سايلاۋبەكتەن گورى قايرات نۇرتاستى، رەڭ-باسى ادەمى ساپييەۆ پەن دۇعالوۆانى جىلى قابىلداسىن دەگەن قۇيتىرقى امال. سونداي ماقساتپەن باس پارتيانىڭ سەزىنەن بىرەر اپتا بۇرىن قوعامعا سايلاۋبەك تاقىرىبى تالقىعا ۇسىنىلدى. ءبارىمىز شۋلادىق كەلىپ. «سۇيىكتى» بيلىگىمىز، «ادىلەت سۇيگىش» پارتيامىز قاشانعى ادەتىنە ساي «ادىلدىك» كورسەتتى، «تەرەڭدىك» تانىتتى. «داۋعا» نۇكتە قويدى. قوعام قابىلداماعان سايلاۋبەك باس پارتيانىڭ تىزىمىندە بولماي شىقتى. «نۇر وتان» «وسىعان ريزا بولىڭدار!» دەمەسە دە، ول پيعىلىن ۇقتىق. پارلامەنتتى قويىپ، پرەزيدەنت سايلاۋىنىڭ ءوزىن شاپان كيگەن كلوۋن امانتاي قاجى، كىشى دارەتىن قۇيعان ىدىستان اس ىشەتىن ايگۇل وتەپوۆالاردى قوسىپ سايقىمازاققا اينالدىرعان قازاقستاندىق ساياسي تەحنولوگتاردىڭ بۇل لاس ويىندارى بىزگە تاڭسىق ەمەس. تەك، وسى سايلاۋلاردان سايقىمازاق جاساۋدان كىم نە ۇتادى دەگەن سۇراقتىڭ مازالايتىنى بولماسا.
جالپى، وسى جەردە ايتا كەتەتىن تاعى ءبىر ماسەلە بار. ەلدەگى ساياسي ۇيىمدار ونەر ادامدارىن، سول توڭىرەكتەگى بيلىككە وڭتايلى باسقا دا تۇلعالاردى ساياسي ويىندارعا ءجيى پايدالانىپ تۇرادى. كەزىندە حالىقتىڭ سۇيىكتى ءانشىسى نۇرلان ونەربايەۆتى، جىرشى بەكبولات تىلەۋحانوۆتى دا ءماجىلىس پارتاسىنان كورگەنبىز. الدىڭعى شاقىرىلىمداردىڭ بىرىندە اكتەر قۇدايبەرگەن سۇلتانبايەۆ مارقۇم دا دەپۋتات بولدى. سول كىسىنىڭ ايتقان: «پارلامەنتتەگىلەردىڭ ءبارى – ءارتىس. سولاردىڭ ىشىندە مەنىڭ عانا ءارتىس دەگەن ديپلومىم بار» دەگەن ءسوز ءالى كۇنگە ۇمىتىلا قويعان جوق. بۇل جولى دا زاڭ شىعارۋشى ورگانعا ءبىراز «ارتىستەر» جينالماق.
«نۇر وتان» ءماجىلىس سايلاۋىنا ۇسىناتىن تىزىمىنە 127 ادامدى قوسىپتى. ماجىلىستە پارتيالىق ءتىزىم بويىنشا سايلاناتىن بارلىعى 98-اق ورىن بارىن بىلەمىز. ەندىگى ماسەلە، الگى ارتىستەر مەن سپورتشىلار قاۋىمىنىڭ سول تىزىمدە 99-شى بولىپ تۇرماۋىندا. پارتيا جەتەكشىلەرى جۇلدىزدارعا وسى قاسيەتتى «توقسان توعىزىنشى» ورىندى بەلگىلەپ بەرۋى دە مۇمكىن. مۇنداي دا بولادى. «اقجول» پارتياسىنىڭ ءقايبىر جىلعى سايلاۋالدى ناسيحات كەزىندە ەل تانيتىن، حالىق قۇرمەتتەيتىن امانگەلدى ايتالى، قازىبەك يسا سىندى تۇلعالاردىڭ اتىن پايدالانىپ، جەمە-جەمگە كەلگەندە پارلامەنتكە پەرۋاشيەۆتىڭ كاسىپكەر سەرىكتەرى عانا وتكەنىن بىلەمىز، ويتكەنى.
سونىمەن، ساياسي دودانىڭ العاشقى قادامىن بيلىك پارتياسى باستاپ بەردى. ەندىگىسىن كورە جاتارمىز.
جومارت ابدوللا ۇلى
