بۇگىنگى بيلىك «جاڭالىق» ەتىپ جار سالىپ جۇرگەن «ماڭگىلىك ەل» ۇعىمىنىڭ باستاۋى سوناۋ كۇلتەگىن زامانىندا جاتقان بولار. دەگەنمەن كەشەگى، حح عاسىردىڭ باسىندا «قاراڭعى قازاق كوگىنە، ورمەلەپ شىعىپ كۇن بولعان» الاشوردا ۇكىمەتى ءوزىنىڭ قىبىلاسىن «ماڭگىلىك ەل» ەتىپ العان ەدى. ءبىز ايتساق الاشتان باستاپ ايتالىق.

الاش تۋى استىندا

كۇن سونگەنشە سونبەيمىز.

ەندى الاشتى ەشكىمنىڭ

قورلىعىنا بەرمەيمىز!

"الاش ۇرانىنان" ارتىق قازاققا قانداي "ماڭگىلىك" كەرەك؟ ەندەشە بۇگىنگى «قازاق ەلى» جار سالىپ جۇرگەن «ماڭگىلىك ەلدىڭ» تۇعىرى – "الاش تۋى استىندا، كۇن سونگەنشە سونبەيمىز" دەگەن الاش يدەياسى بولۋ كەرەك ەدى. ءبىراق قازىرگى جاعداي مۇلدەم كەرەعار.

الاشتىقتار رەسەيدەن قالاي ىرگەسىن اۋلاققا سالۋدى ويلاسا، بۇگىنگى «ماڭگىلىك ەل» مۇراگەرلەرى  ءقايتىپ ورىستىڭ قۇشاعىنا كىرەمىز دەپ جانتالاسۋدا. تاۋەلسىزدىكتەن كەيىنگى 23 جىلدىق «جانتالاس» ناتيجەسى – ەۋرازيالىق ەكونوميكالىق وداق بولايىن دەپ تۇر.

بۇگىن ءاليحان بوكەيحانوۆتىڭ تۋعان كۇنى. قازاقتىڭ تاريحىن، تاۋەلسىزدىگىن بەكەمدەيتىن مۇنداي مەرەيلى كۇندى قازاق بيلىگى قاپەرىنە المايدى. ەسەسىنە «جاڭا جىل» دەسە، «جەڭىس كۇنى» دەسە، ونىڭ پالەنباي جىلى دەسە ستالين كوردەن ءتىرىلىپ كەلگەندەي تايلى-تۇياعىنا دەيىن اتقا قونادى. مىنە «ماڭگىلىك ەلدىڭ» بۇگىنگى سيقى.

كوزىنە شەل بىتكەن شەنۋنىكتەر الدا كەلە جاتقان ءاليحان بوكەيحانوۆتىڭ 150 جىلدىعىن،  الاشوردا ۇكىمەتىنىڭ 100 جىلدىعىن وتكىزۋدى نازارىنا الماسا الماسىن. ونسىزدا كۇنى ءبىتىپ، كۇلدى-بادام تىرلىكتەرىنە نۇكتە قويىلاتىن كەز كەلە جاتىر.

ءوزىن تەكتى اتانىڭ بالاسىمىن دەپ سەزىنەتىن بىلايعى جۇرت «الاشوردا» يدەياسىن ساناسىنان ەش وشىرمەيدى. ويتكەنى ول – ماڭگىلىك ەلدىڭ ماڭگىلىك يدەياسى. كۇن سونگەنشە سونبەيى.

حازىرەت ءابدىلدا