Almatyda el bilmeıtin tyń oryndar kóp.Sonyń biri - jer astynan salynǵan teatr sahnasy. Jerden 4 metr tereńdikte salynǵan oryn osydan 1 jarym aı buryn ashylǵan eken. Bas suǵýshylar qarasy birte kóbeıip keledi. Almatyda jurt kózinen tasa jerde ornalasqan oryn bul. Mýzykalyq kúıtabaq, kofe, túrli janrdaǵy basylymdar. Dará men Tommı degen jup bul nysandy ózderinshe erekshelep alǵan, - dep habarlaıdy Almaty telearnasy.

Munda vınıldi kúıtabaqtardy alyp, tyńdap, tipti aldyńǵy qatarly sheteldik jáne otandyq basylymdardy kofe nemese shaı ishe otyryp oqýǵa bolady. Uıymdastyrýshylardyń aıtýynsha, almatylyqtardyń arasynda ónerdi baǵalaıtyndar kóp eken. Sodan bolar kelýshiler munda qaraqurym aǵylady deıdi.

"Bizdiń Almaty qalasynda osyndaı demalys ornyn ashýdyń ózindik sebebi bar. Ashylǵan kúnnen bastap kelýshilerimiz qatary kóp. Olar kúıtabaqtardy tyńdap, tipti aýystyryp alýyna bolady. Eń bastysy ol tegin. Sondaı-aq aldyńǵy qatarly basylymdardy shaı ishe otyryp oqı alady. Osylaısha ýaqytyn tıimdi paıdalanatynyna senimdimiz. Ózge memleketterde bul dúnıe tańsyq emes",- dedi mýzykant Tommı Sımpson.

Dál qazir men, jer betinen 4 metr tereńdikte ornalasqan kádýilgi býnkerde turmyn. Salynǵanyna 40 jyl bolǵan bul jer alǵashynda qorqynyshty bolyp kórinýi múmkin. Degenmen bul jer - naǵyz óner ordasy. Munda túrli sahnalandyrylǵan qoıylymdar, mádenı is-sharalar ótedi. Eń qyzyǵy uıaly baılanystyń keregi joq. Sol sebepti alańsyz demalyp, qoıylymdy tamashalap, rýhanı baılyq ala alasyz.

Sonymen qatar, bul jerde túrli janrdaǵy fototúsirilimder, sýret kórmeleri de ótip turady. Bir úıdiń balalaryndaı bolyp ketken ártister ár qoıylymǵa tyńǵylyqty daıyndalamyz deıdi. Olardyń jerasty býnkerin tańdaýynda da ózindik erekshelik bar.

"Bul jer kelgen kúnnen bastap bizge erekshe áser qaldyrdy. Alǵashynda bul jerge kúrdeli jóndeý jasadyq. Qoıylymǵa qajetti dúnıelerdi ózimiz alyp kelemiz. Bul jer bizdiń ekinshi úıimizge arnaldy. Kelýimizdiń de ózindik sebebi bar. Burynǵy nysan bizge tar boldy. Kóp izdedik. Aqyrynda osy jerdi tańdadyq, árıne kóńilimizden shyqty",- dedi teatr dırektory Ksenıa Kýteleva.

Ashylǵanyna bir jarym aı ýaqyt bolǵan orynda 3 qoıylym sahnalanyp úlgergen. Ártisterdiń ónerin tamashalaýǵa keletin turaqty kórermen de bar. Budan bólek, atalmysh jer ózge óner adamdaryn, atap aıtsaq fotograftardy, sýretshilerdi qatty qyzyqtyratyn kórinedi. Jaýaptylar jurtty ereksheligimen baýrap alǵan aýmaqty jýyrda keńeıtýdi josparlaýda. Olar bos turǵan býnkerdiń ekinshi jaǵynan kórermender demalatyn oryn ashpaq. Sóıtip, osynda keletinderdiń sany taǵy da ulǵaıady degen boljam bar.