Memlekettik qyzmetkerlerdiń adammen til tabysýy jáne azamattarǵa kórsetken qyzmet sapasy jiti qadaǵalanatyn bolady, - dep habarlaıdy «Qamshy» portaly QazAqparatqa silteme jasap.

Bul týraly búgin Ortalyq komýnıkasıalar qyzmetinde ótken baspasóz máslıhatynda QR Memlekettik qyzmet isteri mınıstrligi Memlekettik qyzmet departamentiniń dırektory Álı Kómekbaev málimdegen.

Onyń sózine qaraǵanda, Qazaqstanda 90 myńnan astam memlekettik qyzmetker bar. Endi olardyń árqaısysy jyl boıy jáne jyl sońynda baǵalaýdan ótip otyrady. Memlekettik qyzmetkerlerdi bir organ nemese bir tulǵa emes, basshylyǵy, áriptesteri jáne qol astyndaǵy qyzmetkerleri de baǵalap otyrady. Onda memlekettik qyzmetkerdiń azamattarmen jumys isteýi ǵana emes, etıkalyq júris-turysy da eskeriledi.

Sonymen qatar memlekettik organnyń strategıalyq maqsattaryn oryndaýǵa baǵyttalǵan árbir memlekettik qyzmetkerdiń jeke jumys josparynyń oryndalýy da qaralady.

«Árbir qyzmetkerdiń árbir qımyly jiti baqylanady dese de bolady. Baqylaý nátıjesi qyzmetkerdi yntalandyrýǵa, oǵan bonýs tóleýge, onyń damýy men oqytylýyna jáne basqa da basqarý sheshimderine áser etedi», - dedi ol.

Eske sala keteıik, 2016 jyldyń 1 qańtarynan bastap, «QR Memlekettik qyzmet týraly» jańa zań kúshine endi.