«Nur Otan» partıasy Almaty qalalyq fılıaly janyndaǵy Sybaılas jemqorlyqqa qarsy kúres jónindegi Qoǵamdyq keńes Almatyda jaldamaly turǵyn úı qurylysy barysynda birqatar zań buzýshylyq áreketterdiń oryn alǵandyǵyn anyqtady, - dep habarlaıdy «Qamshy» portaly QazAqparatqa silteme jasap.

Onda kún tártibine Ulttyq qor tarapynan «Jaldamaly turǵyn úı» baǵdarlamasy boıynsha bólingen qarjynyń jumsalýyn tekserý máselesi qoıyldy. 

Keńes múshesi Borıs Japarov ótken jyldyń sońynda ótkizilgen otyrystardyń birinde Jumys tobynyń «Jaldamaly turǵyn úı» baǵdarlamasy boıynsha bólingen qarajattyń jumsalý tıimdiligin tekserý boıynsha qorytyndy esebi tyńdalǵandyǵyn eske saldy.  Sonda birqatar qurylys kompanıalary Jumys tobynyń tujyrymymen kelispegen eken. 

«Shaǵymdanýshylardyń talaby boıynsha kelesi kúni Máslıhat depýtattary memlekettik organdardyń ókilderimen birge, jańadan salynyp jatqan «Jas Qanat» yqsham aýdanynyń aýmaǵyna bardy.

Sonda qujattaryna qol qoıylyp, paıdalanýǵa berýge daıyn úılerdi qaıta tekserý barysynda qurylys-qurastyrý jáne árleý jumystary barysynda odan da kóp bassyzdyq áreketterdiń bolǵandyǵy áshkerelendi. Odan basqa, qurylysta zańsyz jumysshylardyń istep júrgendigi jáne qaýipsizdik tehnıkasynyń saqtala bermeıtindigi anyqtaldy», - dedi B. Japarov. 

Ol sondaı-aq, salýshy kompanıalardyń salynyp jatqan turǵyn úılerdiń smetalyq qunynyń tómen ekendigin aıtyp shaǵymdanǵanyn da aıtty.

«Olardy tenderge qatysýǵa eshkim májbúrlegen joq. Bul halyqtyń aqshasy ǵoı. Sondyqtan, qabyrǵalary qısyq, sylaǵy jarylyp ketken páterlerdi qabyldaýǵa bolmaıdy», - dedi ol.

Almaty qalalyq qurylys basqarmasynyń ókili Azamat Rahımov ótken jyly Almatyda «Nurly jol» baǵdarlamasy boıynsha 15 turǵyn úıdiń paıdalanýǵa berilgendigin jáne bıyl taǵy 13 turǵyn úıdi paıdalanýǵa berý josparlanǵandyǵyn aıtty. Al atalǵan kemshilikterdiń kóktemge qaraı túzetiletindigine ýáde berdi. 

«Maǵan qurylys basqarmasynyń ustanymy túsiniksiz. Nege der kezinde shara qoldanylmady? Mundaı úılerdi qalaı qabyldaýǵa bolady? Qoǵamdyq keńestiń músheleri qurylys kompanıalaryn tańdaý sharasyna óte jaýapkershilikpen qaraýlary tıis. Budan bylaı da Keńes músheleri qurylys jumystary barysyn qatań baqylaýǵa alyp, osy baǵytta bılikpen tyǵyz jumys atqaratyn bolady», - dedi Qoǵamdyq keńes tóraǵasy Rahman Alshanov.