Ótken aıda ǵana jergilikti qyzdar komandasy Avstrıada ótken álem chempıonatynan qola júldemen oraldy. Sóıtip, álemdik úzdikterdiń ortasynan oıyp turyp oryn alǵan sportshylarymyz óz sheberlikteriniń eshkimnen kem túspeıtindigin kórsetti, - dep habarlaıdy «Qamshy» portaly 24 kz-ke silteme jasap.

Qyzdar tek án aıtyp, bı bılep, ári ketse kórkem gımnastıkamen aınalysý kerek degen qaǵıda joq. Avstrıadaǵy álem chempıonatynan úshinshi oryn alyp oralǵan óskemendik hokeıshi boıjetkender osyny dáleldedi.

"Bizdiń maqsatymyz jeńis bolatyn. Degenmen úshinshi orynǵa iligemiz dep oılamaǵan edik",- dedi «Ýstınka» komandasynyń kapıtany Aleksandra Kokorına.

"Bul tarıhı oqıǵa dep aıtýǵa bolady. Tuńǵysh ret qazaqtyń hokeıshi qyzdary osyndaı qola medal alyp otyr. Qyzdarymyz bizdiń hokeıdi taǵy bir joǵarǵy deńgeıde kóterdi dep aıta alamyn", dedi oblystyq sport jáne dene shynyqtyrý basqarmasynyń jetekshisi Eldos Chıkenov.

Hokeıden qyzdar komandasynyń irgetasy Óskemende qalanǵan dese de bolady. Óńirde qyzdardy bul sport túrine kishkene kezden bastap baýlý ádetke aınalǵan. Máselen Polına Galkınany ákesi 6 jasynan bastap hokeı sportyna beripti. Al Dıana Moskvına bolsa 5 jasynan bul sport túrimen áýestene bastaǵan.

"Qaqpashy barlyq komandany qutqara alady. Oıynshylardyń múlt ketetin kezderi az emes. Ásirese qorǵaýshylardyń áli jetpeı jatqan kezde bizdiń jaýapkershiligimiz arta túsedi", deıdi qaqpashy Dıana Moskvına.

Hokeı sporty qatal da qıyn. Oıynshylar epti de kóregen bolýy qajet. Tipti salmaǵy 10 keliden asyp ketetin hokeıshiler kıimin kóterip júrýdiń ózi qyzdardan úlken tabandylyqty talap etedi. Alaıda jeńis tuǵyryna kóterilgende osy qıyndyqtyń bári áp-sátte umytylady. Jattyqtyrýshylardyń aıtýynsha, Avstrıadaǵy jeńis hokeıshi boıjetkenderdiń qaıratyn shyńdap,maqsattaryn aıqyndady. Sondaı-aq búldirshinderdiń osy sport túrine degen qyzyǵýshylyǵyn arttyra tústi.