Eýrazıalyq ekonomıkalyq odaqtyń ortaq valútasyn aınalymǵa shyǵarý týraly áńgimeni endi aıyrqalpaqty aǵaıyn aıta bastady. Qyrǵyzstannyń vıse-premeri Aaly Qarashev Bishkekte ótip jatqan «Eýrazıalyq ekonomıkalyq perspektıvalar» forýmy kezinde odaqtyń ortaq valútasyn engizý máselesin jaqyn kúnderi qarastyrý kerek dep málimdedi.

«Bizge óte shuǵyl túrde valútalyq retteý máselelerin qarastyrý qajet. Atap aıtqanda, uıym ishindegi birlesken saýda men kedendik retteýlerdi júzege asyrý úshin EAEO-nyń ortaq valútasyn engizý týraly máseleni qaraýymyz kerek», - deıdi A. Qarashev.

Buǵan deıin byltyr qarasha aıynda RF Memlekettik dýmasynyń depýtaty Leonıd Slýskıı Eýrazıalyq ekonomıkalyq odaq elderine arnalǵan birińǵaı esep aırysý quralyn ázirleý boıynsha jumys belgili-bir qıyndyqtarǵa qaramastan júrgizilip jatqanyn málimdegen edi. Bul málimdeme qoǵamda birqatar narazylyqqa tap bolyp, Qazaqstan basshylyǵy tarapynan kún tártibinde odaqtyń ortaq valútasyna kóshý máselesi qarastyrylyp jatpaǵanyn habarlaǵan bolatyn.

Bul máselede uıymǵa múshe elder áli bir toqtamǵa kelmegenimen jekelegen sheneýnikter men saıasatkerler ortaq valúta týraly aýyq-aýyq eske salyp turatynyn eskerý kerek.

Onyń ústine ǵalamdyq qarjy daǵdarysynyń qyspaǵyn AQSH-tan kóretin postkeńestik elder dollarsyzdaný saıasatyn qyzý júrgizip jatqanyn qaperge alsaq, ortaq valúta engizý týraly ıdeıanyń júzege asý múmkindigi joq deı almaısyz.

Bul bastamanyń postkeńestik keńistikte yqpalynan aırylǵysy kelmeıtin Reseıdiń tarapynan jıi kóterilip júrgenine eshkim tań qalmaıdy. Alaıda, Eýrazıalyq ekonomıkalyq odaqqa byltyr tamyz aıynda ǵana qosylǵan, Dúnıejúzilik saýda uıymynyń 1998 jyldan beri múshe bolyp otyrǵan Qyrǵyzstannyń ortaq valútaǵa nelikten qumarta qalǵany túsiniksiz bolyp otyr.