Almatyda «Asfáltobeton-1» JSHS jańa jelisi iske qosyldy. Ónerkásip orny kásipkerlikti qoldaý kartasynyń İİ besjyldyǵy aıasynda ashyldy, - dep habarlaıdy «Qamshy» portaly QazAqparatqa silteme jasap.
Atap aıtqanda, óndiris ornynda asfált óndirýdiń jańa zamanaýı jelisi ashyldy. Engizilgen sapaly qural-jabdyq ónimniń sapasyn jaqsartyp, ónim kólemin 80 paıyzǵa arttyrady.
Endi kásiporyn jylyna 1 mln tonna ónim óndiretin boldy. Mundaı óndiristik qýat Almaty qajettiliginiń 70 paıyzyn qanaǵattandyrýǵa múmkindik bermek.
Aıta ketý kerek, kásiporynda qazaqstandyq qamtý kórsetkishi óte joǵary. Zaýytta tek otandyq shıkizat paıdalanylady. Qazirgi tańda munda 500 adam eńbek etip júr.
«Búginde memlekettik qoldaý qarjy birinshi kezekte kásipkerlikti qoldaýǵa baǵyttalyp otyr. Otandyq taýarlar men qyzmet túrlerin óndirý, olardyń sapasyn arttyrý, olardy syrtqy jáne ishki naryqta júrgizýge memleket asa kóp kóńil bóledi. Bul jerde Almatynyń alar orny erek», - dedi qala ákimi Baýyrjan Baıbek.
«Kompanıa ónimderi «Nurly jol» jańa ekonomıkalyq saıasat baǵdarlamasy aıasynda salynatyn avtojoldar men ınfraqurylym jobalaryn júzege asyrýǵa paıdalanylady. Sondyqtan, asfált zaýytynyń jańa óndirisi asa úlken mańyzǵa ıe», - dedi kompanıa dırektory Varıs Islamov.
Kásipkerlikti qoldaý kartasynyń ekinshi qatysýshysy «Intermýltıservıs» JSHS gofroqaptama óndirýmen aınalysady. Óndiris kólemi jyldan-jylǵa artyp keledi.
Eger 2014 jyly 506,6 mln teńgeniń ónimin óndirse, 2015 jyly kásiporynnyń óndiristik qýaty 614,3 mln teńgege jetken. Zaýytta 100 adam jumys jasaıdy.
Aıta ketý kerek, kásipkerlikti qoldaý kartasynyń İ besjyldyǵy aıasynda Almatyda quny 280 mlrd teńge bolatyn 20 joba júzege asty. Jańa jobalar 3 myń jumys ornyn ashýǵa múmkindik berdi.
Al İİ besjyldyǵy aıasynda quny 120 mlrd teńge bolatyn 55 joba qarastyrylǵan. Bıyl quny 37 mlrd teńge bolatyn 16 joba júzege asyrylyp, 4 344 adam jumyspen qamtylady dep josparlanyp otyr.
