Elimizdiń prokýratýra organdary barlyq menshik nysandaryndaǵy kásiporyn  qyzmetkerlerine eńbekaqynyń ýaqtyly berilýin qamtamasyz etý jónindegi sharalar keshenin júrgizýde, - dep habarlaıdy «Qamshy» portaly QazAqparatqa silteme jasap.

Bul baǵytta ýákiletti memlekettik organdarmen, jumys berýshiler qaýymdastyǵymen jáne kásipodaqtarmen ózara is-áreket jasaý júıesi ornatylǵan.

Eńbek aqysy boıynsha merzimi ótken qaryzdardy jabý maqsatynda turaqty monıtorıń júrgizilýde.

Jyl basynan beri qadaǵalaý aktilerimen 2 mlrd. teńge kólemindegi 30 myńǵa jýyq azamattyń eńbek aqysy boıynsha qaryzdardy óteý qamtamasyz etilgen.

Mysaly, osy jyldyń sáýir aıynda Aqtóbe oblystyq prokýratýrasynyń qoldanǵan sharalary  nátıjesinde «OılTehnoGrýpp» JSHS, «LAD» JSHS jáne «Aqkól» JSHS qyzmetkerleriniń aldynda jalpy somasy 28,2 mln. teńgeni quraıtyn qaryzdyń ótelýi qamtamasyz etildi.

Aqmola oblysynyń prokýratýrasy quziretti organdarmen birlese otyryp «Jeke batyr» JSHS-niń 15 qyzmetkerine 148,7 mln. teńge kólemindegi qaryzdy óteý jónindegi sharalardy qabyldady.

Azamattardyń eńbek quqyqtarynyń buzylýyna kináli tulǵalardy jaýapkershilikke tartý jónindegi máseleler prokýrorlardyń erekshe baqylaýynda.

Jyl basynan beri prokýrorlyq qadaǵalaý aktileri boıynsha 245 jumys berýshi ákimshilik jaýapkershilikke tartylǵan kórinedi.