Búgin qazaqstandyq kásipqoı boksshy, WBA (Super), IBO, WBC (Interim) jáne IBF versıalarynyń ortasha salmaqtaǵy chempıony Gennadıı Golovkın Jordan Brand atrıbýtıkasyn shyǵarýshylarmen kelisim-shartqa otyrǵanyn aqparat quraldary jazýda. Bul týraly «Qamshy» portaly habarlaıdy.

Jordan Brand – ataqty Nike saýda belgisi men basketbolshy Maıkl Djordannyń birikken jobasy. Gennadıı Golovkın bul brendpen kelisimge otyrǵan Andre Ýord pen kishi Roı Djonstan keıingi úshinshi boksshy. Osy ýaqytqa deıin bul markanyń ókili bolý baqyty barlyǵy 50 sportshyǵa ǵana buıyrǵan kórinedi.

Kompanıa prezıdenti Larrı Mıller osy oqıǵaǵa qatysty: «Biz Gennadııdi óz otbasymyzǵa qabyldaǵanymyzǵa qýanyshtymyz», - dese, boksshynyń ózi Týıtterdegi paraqshasyna: «Jordan Brand-tiń bir bólshegi bolǵanyma qýanyshtymyn», - dep jazdy.

Otandyq boksshynyń álemdik brend ıelerimen teń dárejede qarym-qatynas ornatyp, ózin moıyndatqany qýanyshty, árıne. Alaıda, Jordan Brand ıeleriniń bir qylyǵy qynjyltyp otyr.

Kompanıa boksshymen jasalǵan kelisimniń nyshany retinde G. Golovkınge tabanynyń ishki jaǵyna Qazaqstan týyndaǵy kún men búrkit beınelengen aıaq kıim syıǵa tartty.

Biraz ýaqyt buryn ulttyq naqyshtaǵy delingen shapanynyń oıýy qoǵam talqysyna túsken Gennadııdi endi ne kútip tur eken?