Qazaqstan Prezıdenti Túrkıa holdıńteri men kompanıalarynyń basshylarymen kezdesti, - dep habarlaıdy «Qamshy» portaly Aqordanyń baspasóz qyzmetine silteme jasap.
Kezdesýge Túrkıanyń Ulker Group, Turkuaz Group, Yildirim Group, Yildiz Holding, Akfel Holding, Aselsan Electronic, Acibadem sıaqty 25-ke jýyq kompanıasynyń basshylary qatysty.
Áńgime barysynda yntymaqtastyqtyń túrli salalarynda birlesken jobalardy júzege asyrý múmkindikteri jóninde pikir almasyldy. Kompanıa basshylary Qazaqstanda sheteldik ınvestorlar úshin jaǵdaı jasalǵanyna alǵys bildirip, munyń qazaqstandyq seriktestermen ózara is-qımyl aıasyn keńeıtý múmkindigine jol ashyp otyrǵanyn aıtty.
Qazaqstan Prezıdenti qazirgi kezde elimizde túrik kapıtalynyń úlesi bar 1600-den asa kompanıa jumys isteıtinine, sondaı-aq Túrkıanyń 15 myńǵa jýyq azamaty turyp jatqanyna nazar aýdardy.
"Qıyndyqtar bar ekenine qaramastan, eki el arasyndaǵy taýar aınalymy 2 mıllıard dollardan asyp túsedi. Prezıdent Erdoǵanmen ýaǵdalastyq boıynsha, bul kórsetkishti 10 mıllıard dollarǵa jetkizýimiz kerek. Sońǵy 10 jylda túrik bıznesiniń bizdiń ekonomıkaǵa salǵan ınvestısıasy 2 mıllıard dollardan asty. Byltyr Qazaqstanda belsendi ınvestısıalyq jumys jasaǵan sheteldik on kompanıanyń úsheýi túriktiki boldy. Mysaly, qazir Qazaqstan men Túrkıanyń jalpy quny shamamen 3 mıllıard dollar bolatyn 91 birlesken jobasy júzege asyrylýda", – dedi Memleket basshysy.
Nursultan Nazarbaev Qazaqstannyń Eýrazıalyq ekonomıkalyq odaqqa músheligi men Qytaı Halyq Respýblıkasymen kórshilestigi aıasynda bıznes úshin týyndaıtyn zor múmkindikterdi atap ótti.
Memleket basshysy Qazaqstanda júzege asyrylyp jatqan Bes ınstıtýsıonaldyq reforma týraly da áńgimelep, onyń aıasynda sheteldik ınvestorlar úshin qolaıly jaǵdaı jasaý jóninde sharalar qarastyrylǵanyn aıtty.
Sonymen qatar, bizdiń el kózdegen maqsattary jóninen QHR-dyń Jibek joly Ekonomıkalyq beldeýi bastamasyna uqsas «Nurly jol» baǵdarlamasyn belsendi túrde júzege asyrýda. Atalǵan jospar aıasynda elimizdi ınfraqurylymdyq turǵydan damytý salasynda aýqymdy jumystar júrgizilip jatyr.
Nursultan Nazarbaev «Nurly joldyń» jáne ındýstrıalyq-ınnovasıalyq damý baǵdarlamasynyń múmkindikterin túrik kompanıalary da tıimdi paıdalana alatynyna senim bildirdi.
Sondaı-aq Qazaqstan Prezıdenti túrik kompanıalaryn aldaǵy «EKSPO-2017» kórmesine qatysýǵa shaqyrdy.
Memleket basshysy kezdesý barysynda aıtylǵan barlyq usynystar men bastamalarǵa qoldaý bildire otyryp, Túrkıa bıznesmenderiniń qyzmetine bizdiń elde jan-jaqty qoldaý kórsetiletinin atap aıtty.
Sondaı-aq, Nursultan Nazarbaev Túrkıanyń on birinshi prezıdenti Abdolla Gúl myrzamen de kezdesti. Kezdesý barysynda Qazaqstan men Túrkıanyń ózara is-qımylynyń negizgi baǵyttary, sondaı-aq halyqaralyq kún tártibindegi meılinshe ózekti máseleler talqylandy.
