Qazir qansha dabyrlasaq ta sóz erkindigi bar. Erinbegen úıinde otyryp ta, baspasóz arqyly da úkimetti synaı alady. Prezıdentti de jerden alyp, jerge salyp jatqandar bar. Depýtattar da synnan tys qalyp jatqan joq. Meniń qolyma qalam alǵyzyp otyrǵany da – osy depýtattarǵa jasalyp jatqan shabýyldar.

Qazaq deseń ózińe tıedi. Biz ózimizge kelgende ǵana batyrmyz. Olaı dep otyrǵanym sońǵy birneshe kún boıy depýtattardy, onyń ishinde parlamentke ótken sanaýly ǵana ultjandy jigitterdi jeksuryn etip kórsetýge tyrysýshylyqty baıqap otyrmyn. Keshe birqatar telearnadan sondaı habarlar kórdim. Onyń artynda kim tur, mundaı áńgime kimpge kerektigi bólek áńgime. Alaıda, mynaǵan nazar aýdartqym keledi.

Jer satý týraly áńgime bir búgin shyqqan joq. 2000 jyldardyń basynda Imanǵalı Tasmaǵambetov bastaǵan Úkimet alǵash ret jer satý týraly áńgimeni bastady. Ol da úlken daýǵa ulasyp, mınıstrler kabıneti men májilis arasynda úlken kelispeýshilik boldy. Ol kezde de jer satýǵa qarsy shyqqan basqa emes, osy depýtattar edi.

Bul joly keıbir aqparat quraldary parlamentti tek Nurtaı Sabılánov pen Bekbolat Tileýhan ustap turǵandaı, sol ekeýine shúıligýde. Ekeýiniń qaı deńgeıdegi saıasatker ekenin, bılik baspaldaqtaryndaǵy salmaǵyn jaqsy bilemiz. Zań shyǵarýshy organnyń sheshýshi rólge ıe bola almaı otyrǵanyn eskersek, ol ekeýi ne tyndyra alady? Sony oıladyq pa? Joq, álde «japtym jala, jaqtym kúıe» dep soqqylaı beremiz be?

Bile bilsek, buǵan deıin de birneshe ret májiliske depýtat bolǵan Nurtaı el men jerge qatysty kóptegen máselelerdi kóterdi. Shyǵys Qazaqstannyń Ulan, Úrjar syndy aýdandarynyń halqy ol kisige dán rıza. Sabılánov sol baǵytynan ázir taıyp ketti dep oılamaımyn.

Bekbolat Tileýhanǵa kelsek, ol da ultjandy, qazaqty qalaı el etsek, abyroıyn kótersek dep júrgen jigit. Tildiń jaıyn tek teledıdardan ǵana emes, parlament tórinen de shyryldap turyp aıtty. Qazaq tiliniń ahýaly týraly Másimovke qarata jasaǵan úndeýin nege umyta qaldyq? Burynǵy da, qazirgi de depýtattardyń ishinde Kárim Másimovke osylaı batyl saýal joldaǵan basqa depýtat bar ma? Tappaısyz. Muny biraq eshkim oılap otyrǵan joq. Áıteýir qaralasaq, kústanalasaq boldy degen maqsat báriniki.

Osy joly shý bolyp otyrǵan jer satý máselesi parlamenttiń ótken shaqyrylymynda zańǵa enip ketkenin barlyqtaryńyz bilesizder. Ol kezde Bekbolat Tileýhan depýtat emes edi. Bektilip ketken, Elbasy qol qoıyp tastaǵan zańdy qaıta qaratatyn qudyret olarda joq. Ondaı bolmaǵan da. Eń bolmaǵanda osyny nege eskermeımiz?!

Ol ekeýi de maǵan eshqandaı jaqyndyǵy joq adamdar. Biri shyǵystyń jigiti, ekinshisi Arqanyń azamaty. Sol óńir halqy da azamattaryna arasha túsedi dep oılaımyn.

Keshe teledıdardan «KTK», «31-kanal» komýnıstik partıanyń depýtaty V. Kosarevti qaharman etip kórsetýde. Qazaqqa jany ashıtyndar jerimizdi aıaýsyz jyrtyp, errozıaǵa ushyratqan sol komýnıstik bılik ekenin nege umytady? Daýly máseleni, halyqtyń jandy jerin ózine abyroı jınaý úshin paıdalanyp otyrǵan Kosarevti kósem kórgenimiz qalaı? Meniń oıymsha, jer máselesin endi bir sheshse, Prezıdent sheshedi. Byltyr qabyldanǵan zańdy da, bıylǵy Úkimettiń bastamasyn da tek sol kisi ǵana bir jaqty ete alady. Sondyqtan da, qur dabyra jasamaı, istiń oń sheshiletin joldaryn izdeıik. Barlyǵymyz Bekbolatty kústanalap júrgende, shynymen de jerimiz satylyp ketpesin!

Sárýar Aınabekov,

Zeınetker, «Murat» sharýa qojalyǵynyń basshysy

Qostanaı oblysy Jangeldın aýdany