Atyraýlyq azamattyq belsendiler qala ákiminiń atyna áleýmettik jelilerde keńinen talqylanyp jatqan aýylsharýashylyq jerleriniń satylýyna qatysty máseleni halyqpen aqyldasý úshin mıtıń ótkizýge ruqsat suraǵan ótinish berdi, - dep habarlaıdy «Qamshy» portaly Azattyqqa silteme jasap.

Ruqsat etilgen jaǵdaıda mıtıń Atyraý qalasynyń Isataı Mahambet atyndaǵy ortalyq alańynda 24 sáýir kúni saǵat 14.00-de ótedi dep josparlanǵan.

Mıtıńini uıymdastyrýshylardyń biri belsendi Maks Boqaevtyń aıtýynsha, narazylardyń basty maqsaty – «Qazaqstan jer kodeksindegi kemshilikter men qarama qaıshylyqtardy túbegeıli joıý úshin halyqtyń qoldaýyn tabý».

– Qazaqstanda bos jatqan jer joq. Biraq olar bireýdiń ıeliginde. Olar (úkimet – red.) sony jalǵa bergisi keledi. Biz ony (qandaı bos jatqan jer telimderiniń ınvestorlarǵa beriletinin – red.) bilýge tıispiz, – dep málimdedi Maks Boqaev.

Azamattyq belsendiler Facebook áleýmettik jelisi arqyly taratqan habarlamalarynda jerdi sheteldikterge satqyzbaýǵa shaqyrdy.

14 sáýirde aýylsharýashylyq mınıstri Asyljan Mamytbekov zańǵa sáıkes jerdi tek Qazaqstan azamattary men jergilikti kompanıalarǵa satýǵa bolatynyn aıtqan.

Qazaqstandaǵy jerge qatysty halyqtyń alańdaýshylyǵy naýryzdyń sońyndaǵy ulttyq ekonomıka mınıstri Erbolat Dosaev shildeniń 1-inen bastap aýyl sharýashylyǵy jerleriniń aýksıon arqyly satylatyny týraly málimdemesinen soń údep ketken. Úkimettiń jospary boıynsha jerdi jalǵa alyp paıdalanyp jatqandarǵa jerin kadastrlyq baǵasynyń 50 paıyzy shamasyna teń baǵaǵa, 10 jylǵa bólip tóleý shartymen satý qarastyrylǵan.