Oqýshylar bitirý keshine arnap jıǵan aqshalaryn aýyr naýqasqa shaldyqqan synyptastaryna berdi, - dep habarlaıdy "Qamshy" portaly "Habar" arnasyna silteme jasap. 

Nazarbaev zıatkerlik mektebiniń oqýshylary mekteppen qoshtasý keshine jınaǵan aqshany qan aýrýyna shaldyqqan synyptasynyń em-domyna aýdardy.

Nazarbaev zıatkerlik mektebiniń 12 synyp oqýshysy Temirlan Myrzaǵalıev búginde Ońtústik Koreıada emdelip jatyr. 

Mektep ujymy da oqýshynyń taǵdyryna beı-jaı qaramaı, óz erikterimen bir kúndik jalaqysyn qaıyrymdylyqqa baǵyttady. 

Temirlan Myrzaǵalıevti emdeý úshin ońtústikkoreıalyq dárigerler: «160 myń dollar kóleminde aqsha qajet», – degen. Ony mamyrdyń birine deıin jınaý kerek. Osyny estigen synyptastary oılanbastan mekteppen qoshtasý keshine jınalǵan azyn-aýlaq qarjyny Temirlannyń esep-shotyna aýdardy.

Jánıa Ábdimash, Temirlannyń synyptasy:

-Sol sátte aqsha óte tez kerek boldy. Jáne mektep bitirý keshine jınalǵan aqshamyz daıyn bolǵan. Sondyqtan biz ony tez bere salýǵa sheshtik. Temirlan kelgende biz bárimiz bir jerge baryp, óte jaqsy ýaqyt ótkizemiz degen senimdemiz. 

Muǵalimder qaýymy da bolashaǵynan zor úmit kútip otyrǵan oqýshyny taǵdyrdyń tálkegine tastamaı, bir kúndik jalaqylaryn Temirlannyń esep-shotyna aýdardy.

Meıram Jákenov, fızıka-matematıka baǵytyndaǵy Nazarbaev zıatkerlik mektebiniń dırektory:

-100 myń dollardan artyq jınap, onyń barlyǵyn sol balanyń shotyna jiberip úlgerdik. Árıne túgel mektepterge, ásirese bizdiń osy basqarýshy uıymymyzǵa úlken alǵysymyzdy aıtamyz.

Bıyl mektep bitiretin Temirlanǵa búginde AQSH-tyń 3 jáne Ulybrıtanıanyń 2 joǵary oqý ornynan usynys túsken. Mektep basshylyǵynyń aıtýynsha, bul ýnıversıtetterdiń bári de qazaq balasyna demeý bolýǵa daıyn. Mektepte Temirlanǵa sabaq beretin sheteldik muǵalimder onyń alǵyr oqýshy ekenin aıtady.

Djon Zenmanı, mektep dırektorynyń orynbasary:

-Kóptegen muǵalimder Temirlandy burynnan tanıdy. Osyndaı aýyr jaǵdaıdy estigen kezde olar ıgi bastama kóterip, qol ushyn berýge nıetti ekendikterin jetkizdi. Bárimiz birden qoldaý kórsetip, múmkindigimizshe em-domǵa qarjy jınadyq. Tez saýyǵyp ketse eken.

Seýl qalasynda em alyp jatqan Temirlan mektebiniń bul qoldaýyn biledi. Sondyqtan arnaıy sálemdeme joldap, úlken alǵysyn bildirgen. Al mynaý onyń ótken jyldyń kúzinde telearnaǵa bergen suhbaty.

Temirlan Myrzaǵalıev, Nazarbaev zıatkerlik mektebiniń oqýshysy:

-Men Nazarbaev ýnıversıtetine nemese sheteldiń bir joǵary oqý ornyna túskim keledi. Injener mamandyǵyn tańdaıtyn shyǵarmyn. Mektepte meni fızıka men hımıa pánderi qyzyqtyrady. 

Synyptastary qajetti somany jınaý úshin qaıyrymdylyq sharalaryn jıi ótkizip, odan túsken qarjyny Temirlannyń týystaryna jetkizýde. Aldaǵy kúnderi Astanadaǵy saýda oryndarynyń birinde oqýshylar konsert berip, arnaıy kórme ótkizýdi kózdep otyr. Búginde bul sharaǵa balalar jappaı daıyndalýda. «Eń bastysy, Temirlan tez saýyǵyp, ortamyzǵa oralsa eken», – deıdi janashyr dostary.