Qaryz tólenbese, káriz qulyptalady. Almatyda komýnaldyq mekeme qaryzy qordalanǵan abonentterdiń káriz qubyryn bitep jatyr, - dep habarlaıdy «Qamshy» portaly «Almaty» telearnasyna silteme jasap.

Dárethana men jýyndy qaldyq sýdan shyqqan jaǵymsyz ıisten qutylýdyń jalǵyz joly - komýnaldyq tólemderdi ýaqytyly jasaý. Biraq qoldanǵan qyzmettiń aqysyn qaıtarǵysy kelmeıtinder sany azaıar emes. 

Buryn bir boryshker úshin búkil úıdiń sý júıesi toqtatylmaıtynyn bilgen tutynýshy qaryzyn tólemeı júre beretin. Komýnaldyq qyzmet mamandary endi bereshegi barlardyń sońynan júgirmeıdi. Qaryzdy qaıtartýdyń tıimdi joly - boryshker páterin arnaıy qurylǵymen dál taýyp, tyǵyndap tastaý.

«Biteýishti salyp, qubyrmen túsiremiz. 12 páter, 4 qabatta ornalasqan. Monıtor arqyly qabatty kórip otyramyz»,- dedi  slesar Máýlen ANDASOV.

Qaryzy bar páterdiń dárethana nemese ózge de las sý aǵatyn qubyryn tyǵyndaý qıyn emes. Shaǵyn kameramen qarap, qubyr jolyn biteý ary ketkende 20 mınýttyń jumysy. Ol úshin páterge kirýdiń de qajeti joq. Shatyrdyń ústine shyǵý jetkilikti. Bir tutynýshynyń qubyry bitelgendikten, tólemdi der kezinde óteıtin úıdiń ózge turǵyndary zardap shekpeıdi.

«Qubyry bitelgen 10 páterdiń toǵyzy sol kúni birden habarlasyp, jyldar boıy jınalǵan qaryzyn jyldam tóleıdi. Biraq bizde qubyrdy qaıta qosý tek juma kúni ǵana júrgiziledi. Sondyqtan basqa kúnderi ortalyqtan ajyratylǵan páterdiń turǵyndaryna jumaǵa deıin shydaýǵa týra keledi»,- dedi «Tospa sý» MKK ishki baqylaý qyzmetiniń jetekshisi Serik SHÁGİROV.

Almatyda qaldyq sýdyń bir tekshe metri úshin tutynýshylar bar bolǵany 28 teńge tóleıdi. Ortasha eseppen ár páter aıyna 150-200 teńgeden tóleýge tıis. Biraq tutynýshylardyń barlyǵy birdeı jaýapty emes. Sondyqtan qordalanǵan qaryz somasy myńdaǵan teńgege jetip jatyr. Búginde kópqabatty úıler turǵyndarynyń taza sý úshin bereshegi -72 mıllıon teńgege jetse, káriz qyzmeti úshin  45 mıllıon teńge bereshek.

«Bir ret óshirsek, ol aqysyz. Al ekinshi ret óshirsek, qaıta qosý quny jıyrma myń teńgege deıin barady. Sondyqtan aıyna shyǵatyn 150 teńgege bola jıyrma myń teńge tóleýdiń qajeti joq. Oǵan jetkizbeı aı saıyn komýnaldyq tólemderdi jasap turyńyzdar der edim»,- dedi «Almaty sý holdıńi» MKK qoǵammen baılanys bóliminiń mamany Aqbota JYLYSOVA.

Qazir qala kóleminde úsh brıgada qaryzy barlardyń káriz qubyryn biteýmen aınalysyp jatyr. Dál osyndaı tásilmen birneshe komersıalyq mekemeler de óshiriledi. Sońǵy ýaqytta 875 páterdiń qubyry tyǵyndalsa, qolqany qabar ıiske shydamaǵan 613 úıdiń ıesi bereshekterin birden tólegen.