Almaty oblysynda 94,4 myń gektar jer aýksıon arqyly satylady, - dep habarlaıdy «Qamshy» portaly QazAqparatqa silteme jasap.

Bul týraly búgin «Memleket basshysynyń 5 ınstıtýttyq reformasyn júzege asyrý boıynsha 100 naqty qadam» Ult josparyn júzege asyrý máselelerine arnalǵan baspasóz máslıhaty barysynda atalǵan óńirdiń basshysy Amandyq Batalov málimdegen.

«35, 36-qadamdarǵa sáıkes, aýyl sharýashylyǵy baǵytyndaǵy jerlerdi naryqtyq aınalymǵa engizý úshin túgendeý júrgizildi, olardy paıdalanýdyń monıtorıńin júrgizý úshin oblystyń elektrondyq Jer kartasy ázirlendi. Nátıjesinde paıdalanylmaıtyn 272,7 myń ga jer anyqtaldy»,-  dedi oblys ákimi.

Óńir basshysy alǵa tartqan derekterge sáıkes, onyń ishinde 77,4 myń gektar paıdalanyla bastady. Al 15,1 myń gektar jer aýdandarǵa qaıtarylyp, ıesiz 53,9 myń gektar boıynsha materıaldar olardy memleket menshigine qaıtarý úshin sotqa beriledi. 14,4 myń gektar memleket menshigine qaıtarylyp, aldaǵy ýaqytta aýksıonǵa shyǵarylady. Salyqtardy on eselengen kólemde arttyrý úshin salyq organdaryna 111,9 myń gektarǵa 186 materıal berildi.

«Aýksıon arqyly satý úshin alańy 94,4 myń gektar 651 jer telimi tańdaldy, qujattardy rásimdeýge 59,8 mln. teńge qarastyrý kózdelýde. 2016 jyldyń 1 shildesinen bastap jerdi jalǵa paıdalanýshy tulǵalar ony 10 jyl merzimge bólip tóleýmen, kadastrlyq qunynan 50 paıyz jeńildikpen satyp alý múmkindigine ıe bolady. Búgingi tańda 9,7 myń ga satyp alýǵa 211 ótinish berildi»,-  dedi A.Batalov.