Qazaqstan Respýblıkasynyń Qarýly Kúshteri Otan qorǵaýshylar kúnine arnalǵan aksıany bastaldy. Er azamattardy 7 mamyr merekesimen quttyqtaý úshin jaı ǵana ózińniń paraqshańda merekelik akvagrım bar vıdeo nemese fotony ornalastyryp, selfı jasap nemese shaǵyn vıdeo túsirý jetkilikti, - dep habarlaıdy «Qamshy» portaly vedomstvonyń baspasóz qyzmetine silteme jasap. 

Aksıa #kzarmy jáne #7mamyr heshtegimen áleýmettik jelilerde bastaý alady.

Kez kelgen qalaǵan adam áleýmettik jelilerde foto nemese vıdeosymen bólisip,  týǵan-týysqandaryna, dostaryna jáne áriptesterine quttyqtaý grıminiń estafetasyn usyna alady. Akvagrım meıram sımvoly túrinde oryndalyp, qolǵa salynýy tıis.

Bul ıdeıany qoldap, qorǵaýshylarymyzdy aıryqsha «jaýyngerlik boıaýmen» boıap, quttyqtaǵandardyń arasynda alǵashqylardyń biri qazaqstandyq estrada juldyzdary  Roza Rymbaeva, Aıgúl Imanbaeva, Tamara Asar, Maıra İlıasova, Serik Ibragımov, telejúrgizýshi Láılá Sultanqyzy jáne taǵy basqalar  boldy.

Otan qorǵaýshylar kúni qarsańynda barsha el osynaý mańyzdy memlekettik merekeni keńinen atap ótetinin aıta keteıik.  Áskerı bólimder men bólimshelerde saltanatty sap túzeýler ótkizilip, jaýyngerlik jáne oqý-jattyǵý daıarlyqtarynda erekshe kózge túsken azamattardy marapattalady. Soǵys jáne eńbek ardagerlerine erekshe qurmet kórsetilip, olardyń qatysýymen mektep oqýshylaryna arnap erlik sabaqtary ótkiziledi. Bilim berý mekemelerinde merekelik erteńgilikter, baıqaýlar, áskerı-qoldanbaly sport túrlerinen jarystar, sondaı-aq saltanatty sap túzeýler ótkiziledi.

Bıyl  Otan qorǵaýshylar kúni 2016 jyldyń tarıhı  ataýly datasy – Qazaqstannyń memlekettik táýelsizdiginiń 25 jyldyǵy jáne «Máńgilik el» tuǵyry – Qýatty Armıa!» biryńǵaı urany  aıasynda ótedi.