Eks-premer-mınıstr Serik Ahmetovtiń isi boıynsha sottalǵan Qaraǵandynyń burynǵy ákimi Meıram Smaǵulov shartty túrde merziminen buryn bosatyldy, dep habarlaıdy «Qamshy» portaly QazAqparatqa silteme jasap.

«Sottalǵan Meıram Smaǵulovtyń  sot taǵaıyndaǵan jazadan shartty túrde merziminen buryn bosatylýy týraly ótinishi qanaǵattandyrylsyn», - delingen Qaraǵandy qalasy Qazybek bı aýdandyq sotynyń qaýlysynda.

Qujatta kórsetilgendeı, M. Smaǵulovtyń ótelmegen ýaqyty 5 aı 18 kúndi quraǵan. Bul merzimge sot probasıalyq baqylaý ornatty.

Sot M. Smaǵulovtyń taǵaıyndalǵan jazanyń jartysyn ótegenin jáne bostandyǵynan aıyrý oryndarynda tártip tanytqanyn eskerdi. 

Qaýlyǵa sáıkes, eks-ákim Qaraǵandy oblysy boıynsha QAJD AK-159/1 túzetý mekemesinde jazasyn óteý kezinde sharýashylyq qyzmet kórsetý jasaǵynyń abattandyrýshy jumysshysy bolyp jumys istedi. Jazasyn óteýshi 8 naýryz - Halyqaralyq áıelder kúni men Naýryz meıramyna arnap konsertter men sporttyq sharalar uıymdastyrǵany úshin madaqtalǵany atalyp ótildi.

Ótinishke sharýa qojalyǵy basshysynyń haty qosa berildi. Fermer sotqa M.Smaǵulov bosaǵan soń ony óz mal ósirý fermasynyń basqarýshysy retinde jumysqa alýǵa daıyn ekenin habarlady.

Sot qaýlysy zańdy kúshine enbedi jáne apelásıalyq ınstansıaǵa oǵan qatysty shaǵymdanýǵa bolady.