Ushaqtan túse sala marıhýanamen ustalǵan ushqysh Roman Bykov sotta ózine taǵylǵan aıyptardan bas tartyp, ushar aldynda esirtki paıdalanbaǵanyn aıtýda, - dep habarlaıdy «Qamshy» portaly.

Onyń aıtýynsha, polısıa tutqyndaǵan sátte qaltasynda shynymen marıhýana bolǵan. Alaıda, ol esirtki zatyn ushaq trapynan taýyp alǵan. Sondaı-aq, ushqysh eń alǵash ret esirtkini 2015 jyly paıdalanǵanyn, sodan beri turaqty túrde marıhýanamen áýestenip júrgenin de jasyrmaǵan.

«Meniń qaltamda shamaly mólsherde marıhýana boldy. Ony men reısten soń ushaq trapynan taýyp aldym. Men esirtkige mas kúıimde ushaq basqarǵan joqpyn. Ondaı aıyppen úzildi-kesildi kelispeımin. Meniń kishi dáretimnen kannabınoıd anyutaldy. Men biraq, marıhýanany ushardan bir apta buryn, jumystan bos kezde paıdalandym», - deıdi R. Bykov.

Esterińizge salsaq, naýryz aıynyń basynda Máskeýden Almatyǵa ushyp kelgen «Eır-Astana» kompanıasynyń ushqyshynan marıhýana tárkilenip, qanynan da esirtki tutyný belgisi anyqtalǵan bolatyn.

Buǵan deıin tergeý kezinde R. Bykovtyń basqasha túsinik bergenin eskerý qajet. Ol osyǵan deıin quqyqqorǵaýshylarǵa marıhýanany Almatyda satyp alǵanyn, sodan qaltasynda umytylyp qalǵanyn aıtqan bolatyn.

Sondaı-aq, ol zańdar men tıisti erejeler usharǵa 48 saǵat qalǵanǵa deıin esirtki paıdalanýǵa ruqsat berilgenin aıtyp, quqyqqorǵaýshylarmen daýlasqan.