Almaty oblysynda qyzyq oqıǵa oryn aldy. VKontakte áleýmettik jelisinde jalǵan esimmen tanysqan qyzdyń ústinen almatylyq jigit İle aýdandyq sotyna shaǵym túsirdi, - dep habarlaıdy «Qamshy» portaly.

Jigit jelide tanysqan qyzben biraz ýaqyt habarlasyp júrgen. Qyzdyń jazǵan sózderi men jelige júktegen sýretterine tánti bolǵan jigit onymen jaqyn tanysýǵa áreket jasaǵan. Kezdesýge shaqyrǵan jigitten qyz birden tátesiniń týǵan kúnine 20 myń teńgelik gúl shoǵyn jáne 30 myń teńge aqsha ákelip berýin suraǵan. Gúlin qushaqtap, 30 myńdy qaltaǵa basqan jigit İle aýdanynyń Jetigen aýylyna kelgende tanysqan qyzynyń múldem basqasha keıpin kórip, shalqasynan túsken.

İle aýdandyq prokýratýrasy habarlaǵandaı, jetigendik 23 jasar qyzdyń basqa da alaıaqtyq áreketterge qatysy bary anyqtalyp otyrǵan kórinedi. Ol elden balabaqsha, oqýǵa túsý syndy máselelerdi sheship beremin dep iri kólemde aqsha alyp kelgen. Tipti, bir kelinshek oǵan bankten 450 myń teńge nesıe alyp bergen, ol azdaı bar altynyn lombardqa qoıyp taǵy 150 myń teńgeni qolyna ustatqan.

«Sotqa deıingi tergeý kezinde aıyptalýshynyń birneshe alaıaqtyq oqıǵasyna qatysy bary dáleldendi. Ol áreketterden azamattarǵa keltirilgen shyǵynnyń jalpy quny 1,5 mıllıon teńgeden asady. Sotta kúdiktiniń kinási dáldense ol 3 jyldan 7 jylǵa deıin bas bostandyǵynan aıyrylýy múmkin», - deıdi İle aýdanynyń prokýrory Muhtar Myńjasar.

Prokýratýra qyzmetkerleri osy is boıynsha jaqyn kúnderi sot prosesi bastalatynyn habarlady. Kúdiktiden ázirge qolhat alynyp, qamaý sharasy qoldanylmaǵan.