Qazaqstanda jappaı satylymǵa shyǵarylatyn jerdiń quny belgili boldy, - dep habarlaıdy «Qamshy» portaly 31-arnaǵa silteme jasap.

Sheteldikterdiń kózi túsip otyrǵan shuraıly, jaıylymdy jerlerdiń ár gektary eń qymbat degende 130 myńǵa satylady. Eń arzany 3-4 myń teńge. Demek, Bógenbaıdyń qany men Abylaıdyń teri tógilgen jerdiń quny 1 qorap pampersten de arzan ketýi múmkin. Qaljyń emes. Ulttyq Ekonomıka mınıstrligi búgin ózi osylaı dep aıtty. Tipti, eldiń narazylyǵyna qaramastan, mınıstrlik  1 mln 400 myń gektar jerdi saýdalaýǵa  daıyndap qoıypty.

Jer satýǵa buqara jappaı narazylyq bildirip jatsa, mınıstrlik baıaǵyda ol jerdiń baǵasyn bekitip qoıypty. Kýveıtteı memleket aýmaǵy sıatyn qazaq jeri nári men qunaryna qaraı saýdalanady eken.

Samat Sársenov, QR Ulttyq ekonomıka mınıstrligi basqarma basshysy:

- Keı jaıylym jerler 2-4 myń teńge turýy múmkin gektary. Eń baǵaly jerler sýarmaly 125 myń teńgege deıin barady gektary. Bul jer túrine baılanysty. 

1 gektary 1 qorap pamperstiń qunynan da arzanǵa ketkeli jatsa da, "Jerdi qymbatqa satyp jatqan joqpyz" degen mınıstrlik qarapaıym sharýanyń da jerge qoly jetetinin aıtady. Alaıda ár adamnyń eń azy qansha jer alýǵa quqysy bar ekenin úkimet deńgeıinde emes, sol baıaǵy shendiler, ákimder sheshedi eken. Al arany keń olıgarhtardyń órisi odan saıyn keńı túspeıdi me degenge mınıstrlik jubatý aıtqandaı boldy.

Samat Sársenov, QR Ulttyq ekonomıka mınıstrligi basqarma basshysy:

- Bir baı adamdarǵa osy aýylsharýashylyq jerler ótip ketip, bir qolǵa shoǵyrlanýy múmkin be? Múmkin emes, sebebi shekteý bar. Mysaly keı aýdandarda sýarmaly jerler az kólemde, shekteý 3-4 ga deıin bar. Óndiristik kooperatıvterde 50,60,80 myń ga deıin bar.

Árıne bul qujat júzinde daıyndalatyn dúnıe. Shendi-shekpendi jerdi barlyq týǵan týys pen dos jaran atyna aýdarsa da sot joq, tek jekelegen adamǵa jazylmaýy tıis. Biraq buqara qansha bazyna aıtsa da, jer satylady. Kúni keshe mınıstr Dosaev 645 myń jer daıyn dese, búgin mınıstrlik 1 mln 400 myńnan astam jerdi satylymǵa ázirlep qoıypty.

Eń kóp jer Qostanaı oblysynda satylady. 300 myń gektar aýksıonǵa ázir tur. Keıin satylatyn aýmaqtyń deni Shyǵys Qazaqstanda ıaǵnı, 225 myńnan artyq bolsa, Qaraǵandy oblysy da sol shamalas. Eń az jer Batys Qazaqstanda saýdaǵa túsedi. Mınıstrlik sandardyń áli ózgeretinin aıtqanymen, jerdi alýǵa ótinish bildirip jatqandar da bar eken.

AMANDYQ BATTALOV, Almaty oblysynyń ákimi:

- Almaty oblysynan 651 myń jer ýchaskesi, 94 myń gektardan astam jerdi satylymǵa ázirlep qoıdyq. Aýksıonǵa shyǵarý úshin 60 mln teńgedeı qarajat jumsaldy. Qazir jer alýǵa 211 adam ótinish bildirgen.

Shekara mańyndaǵy jerler jeke menshikke ótpeıdi degen mınıstrlik qazir jerdi jalǵa alyp otyrǵan adamdarǵa "jerdi satyp al" dep eshkim májbúrlemeıdi deıdi. Erik ózinde, bastysy, jeńildik jetedi dep maqtandy mınıstrlik. Jer bás saýdaǵa salynsa, 50 paıyz jeńildik, 10 jyl bólip tóleý taǵy bar. Tıynǵa ketetin jer, bastysy sheteldikterge satylmaıdy dep jubatty bılik. Alaıda qazir ózge el azamattary qurylys, ózge de maqsattar úshin 1400-den astam jer telimin satyp alǵan.