Ǵ.Músirepov atyndaǵy Qazaq memlekettik akademıalyq balalar men jasóspirimder teatry  26 sáýirde Túrkıanyń Koná qalasynda bolatyn "Myń bir tynys jáne bir daýys" atty Halyqaralyq teatrlar festıvaline attandy, - dep habarlaıdy «Qamshy» portaly teatrdyń baspasóz qyzmetine silteme jasap.

Túrkıanyń tórt teatrynan bólek, Ázirbaıjan, Moldava, Bolgarıa, Makedonıa, Kıpr, Grýzıa, Qytaı memleketteriniń óner oshaqtary qatysatyn festıválge Qazaqstannyń atynan Ǵ. Músirepov atyndaǵy teatr ujymy joldama alǵan bolatyn.

Bıyl toǵyzynshy ret uıymdastyrylyp otyrǵan Halyqaralyq festıválge teatr ujymy G.Hýgaevtyń "Qara shekpen" qoıylymyn daıyndaǵan. Qoıýshy rejıseri - Qazaqstannyń eńbek sińirgen qaıratkeri Asqat Maemırov. Rólderde oınaıtyndar:  Danıar Bazarqulov, Áset Esjan, Edil Ramazanov, Janar Maqasheva, Sánıa Erzat, Darhan Súleımenov, Erlan káribaev, Gúlbahram Baıbosynova, Erbol Sadyrbaev, Erbol Idrısov jáne  Gaýhar Saǵynǵalıeva, Tolqyn Nurbekova, Qýanysh Turdalın, Móldir Qonysqyzy, Dınara Shymyrbaeva, Eldar Otarbaev.

"Jer betin mekendeıtin on segiz myń ǵalamnyń ishindegi eń qudirettisi de, eń ádemisi de - Adam"... Al, Biz, dál osyndaı "dárejege" rasymen, laıyqpyz ba?!

Kez-kelgenimizdiń boıymyzda bar ózimshil qasıetter basym túsip, jan azyǵynan maqurym qalǵan adamdaı adamdyq qasıetimiz joıylyp, keıde haıýanǵa aınalyp bara jatqanymyzdy ózimiz de baıqamaı jatamyz...»
Dál osy saýaldarǵa jaýap izdeıtin "Qara shekpen" qoıylymy - túrkitildes halyqtardyń zor yqylasyna bólenedi degen senimmen, teatr ujymyna sáttilik tileımiz!», - delingen baspasóz qyzmeti taratqan habarlamada.