Atyraý qalasynyń irgesindegi kóne qala Saraıshyq ornyn tolassyz jınalatyn sýdan joıylyp ketýi múmkin. Bul týraly elimizdiń Mádenıet jáne sport mınıstri  Arystanbek Muhamedıuly Senat depýtattarymen kezdesýde málimdedi.

Mınıstrdiń aıtýynsha tarıhı oryn sý astynda qalýy múmkin.

«Bul máseleni baqylaýda ustap otyrmyz. Saraıshyq – Altyn Ordanyń astanasy bolǵan tarıhı qala. Ókinishke oraı, qazir onda Jaıyq ózenindegi jaǵdaıǵa oraı qıyndyq týyp tur. Sizder bilýge tıissizder, munda naqty shekaralar bar. Iaǵnı, Qoja Ahmet Iassaýı kesenesi, Tamǵaly eskertkishteri, Esik qalasy syndy tarıhı oryndarǵa biz tikeleı jaýaptymyz. Olar – respýblıkalyq qoryq, mýzeıler bolyp sanalady. Al, Saraıshyq qalasy Atyraý oblysyna qarasty. Oǵan solar jaýapty. Eger osyndaı apattyq jaǵdaı Qoja Ahmet Iassaýı kesenesinde, Otyrarda bolsa, biz ol úshin tikeleı jaýapty bolar edik. Munda naqty gradasıany túsiný kerek», - deıdi mınıstr.

Tarıhı orynnyń taǵdyryn Atyraý oblysy basshylaryna ysyrǵan mınıstr bul máselege oraı oblystyń burynǵy basshysy, búginde Májilis depýtaty bolyp otyrǵan Baqtyqoja İzmuhambetovpen áńgimeleskenin de alǵa tartypty.

Saraıshyqtyń ahýaly áleýmettik jeli qoldanýshylaryn da az alańdatyp otyrǵan joq. Feısbýk áleýmettik jelisinde Jandos Temirǵalı esimdi qoldanýshy tarıhı qalanyń sýmen shaıylyp ketýi múmkin dep dabyl qaǵýda.  

Onyń aıtýynsha, jyl saıyn tarıhı qalanyń ornyn sý alatyn kórinedi. Sý keri qaıtqanda ondaǵy tarıhı eskertkishter de shaıylyp, adamdardyń súıekteri jer betine shyǵyp qalatyn kórinedi.

«Memleket buǵan shuǵyl aralasyp, ózenniń arnasyn burýy nemese bóget salýy, sol arqyly osy kúnge deıin saqtalyp qalǵan murany aman alyp qalýy qajet», - deıdi J. Temirǵalı.