Atyraýlyq belsendiler jer satýǵa qarsy Isataı-Mahambet alańynda beıbit sherý ótkizýge qala basshylyǵynan ruqsat suraǵan. 24 sáýir kúni ótýi tıis mıtıńke Atyraý basshylyǵy ruqsat bermegen. Qala turǵyndary soǵan qaramastan ereýilge shyǵý nıetinen bas tartpaǵan, - dep habarlaıdy «Qamshy» portaly 31-arnaǵa silteme jasap.

Qazaqtyń keń-baıtaq jeri  satylymǵa shyǵarylyp, talan-tarajǵa túsedi degenge qarsylyq bildirgen Atyraý halqy 24-shi sáýir kúni   jappaı jınalyp, mıtıńke shyqpaqshy. Tipti belsendiler aldyn-ala qalalyq ákimdikke hat jazyp, Isataı men Mahambet alańyn berýdi suraǵan. Belsendi top  josparlarynyń barlyǵyn  áleýmettik jelidegi paraqshalaryna   jazǵan.

ÁSEL NURǴAZIEVA, quqyq qorǵaýshy:

 -Endi bizder jerimizdi ózimiz ala almaı júrmiz. Óz basyma kelsek, 12 jyl boıy bir quıtaqandaı ózim jerimdi ózim ala almaı júrmin. Bizder endi ony shetelge satamyz degende sonda qazaqtarymyzǵa ne qalady?

Alaıda jerdiń satylýyna qarsylyq bildirmek nıette arnaıy jıyn ótkizbek bolǵan belsendilerge qalalyq ákimdik ruqsat bermedi. Naqtysy, Isataı men Mahambet alańy mıtıńke arnalmaǵandyqtan, ruqsat bere almaımyz degen. Al belsendiler beıbit mıtıń ótkizýge basqa jer berý týraly usynys tastady, bolmasa qaladaǵy bas alańǵa shyǵamyz dep otyr.

Al, Atyraý mańynda kózge túsken áskerı tehnıkalar mıtıń josparlap otyrǵan óńir halqyn biraz shoshytty. Muny jurt, beıbit mıtıń ótkizbek bolǵandardy sabasyna túsirý úshin ákelindi dep jobalady. Alaıda, jergilikti basylymdardyń birine jaýap bergen  Batys óńirlik áskerı prokýrorynyń orynbasary Dýman Ábeýov: «Atyraý oblysynyń aýmaǵynda ornalasqan áskerı bólimderdiń áskerı qyzmetshileri Mańǵystaý oblysynda 18-24 sáýir aralyǵynda ótetin «Qarataý-2016» taktıkalyq-saptyq jattyǵýlarǵa shyqqan bolatyn. Oqý-jattyǵýda áskerlerdiń lańkestik qaýipterge qarsy birikken is-qımyldary pysyqtalatyn bolady», - dep túsinikteme beripti.